දිවයින පුරා ශීඝ්රයෙන් ව්යාප්ත වන ඩෙංගු රෝගී තත්ත්වය පාලනය කිරීම සඳහා, රෝගීන් වැඩිපුරම වාර්තා වන අධි අවදානම් කලාපවල පිහිටි සියලුම පාසල්, විශ්වවිද්යාල සහ වෘත්තීය පුහුණු ආයතන අවම වශයෙන් සති දෙකක කාලයකට වසා දමා එම පරිශ්රයන් පිරිසිදු කිරීමට පියවර ගන්නා ලෙස වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානය රජයෙන් ඉල්ලා සිටී. එම සන්ධානයේ සභාපති, විශේෂඥ වෛද්ය චමල් සංජීව මහතා පෙන්වා දෙන්නේ රජයේ, අර්ධ රජයේ සහ පෞද්ගලික අංශයේ සියලුම අධ්යාපන ආයතන සම්බන්ධයෙන් මෙම තීරණය කඩිනමින් ගත යුතු බවයි. මේ වන විට රට පුරා ඩෙංගු රෝගීන් 70,000කට ආසන්න සංඛ්යාවක් වාර්තා වී ඇති අතර, සැබෑ රෝගීන් සංඛ්යාව මීට වඩා බෙහෙවින් ඉහළ විය හැකි බව ද ඔහු සඳහන් කළේය.
රෝහල් පද්ධතියේ පවතින දැඩි අවදානම පිළිබඳව අදහස් දක්වමින් ඒ මහතා කියා සිටියේ, බොහෝ රෝහල්වල ධාරිතාව ඉක්මවා යාම හේතුවෙන් රෝගීන්ට ඇඳන් යට සහ කොරිඩෝවල පවා රැඳී සිටීමට සිදුව ඇති බවයි. මේ හේතුවෙන් සෞඛ්ය සේවකයන් දැඩි ලෙස වෙහෙසට පත්ව ඇති අතර රෝගීන්ට නිසි නේවාසික පහසුකම් නොමැති වීමෙන් ඔවුන්ගේ ජීවිත අවදානම ද ඉහළ ගොස් තිබේ. “අශ්වයා පලා ගිය පසු ඉස්තාලය වැසීමෙන් පලක් නැහැ” යැයි පවසන විශේෂඥ වෛද්යවරයා, තත්ත්වය පාලනයෙන් ගිලිහී යාමට පෙර අධ්යාපන හා සෞඛ්ය අමාත්යාංශ එක්ව කඩිනම් සහ තීරණාත්මක පියවරක් ගත යුතු බව වැඩිදුරටත් අවධාරණය කළේය.
