ජනලේඛන හා සංඛ්යාලේඛන දෙපාර්තමේන්තුව විසින් ශ්රී ලංකාවේ කෘෂිකාර්මික නොවන ආර්ථික ක්රියාකාරකම් පිළිබඳ තොරතුරු රැස් කිරීම සඳහා ප්රථම වරට ‘ඊ-ආර්ථික සංගණනය’ (e-Census 2026) ආරම්භ කර තිබේ. මුදල්, ක්රම සම්පාදන සහ ආර්ථික සංවර්ධන අමාත්යාංශයේ මඟපෙන්වීම යටතේ ක්රියාත්මක මෙම වැඩපිළිවෙළ රටේ ආර්ථික සැලසුම්කරණය සඳහා ශක්තිමත් දත්ත පදනමක් සපයයි.
මෙම ඩිජිටල් සංගණනය රටේ පවත්නා සියලුම කර්මාන්ත, ඉදිකිරීම්, වෙළෙඳ සහ සේවා කටයුතු ආවරණය කරමින් ක්රියාවට නැංවේ. මෙහි මුල් අදියර ලෙස, සේවක සංඛ්යාව 50 හෝ ඊට වැඩි විශාල පරිමාණ ආයතනවල තොරතුරු රැස් කිරීම ඊයේ (01) සිට ආරම්භ කර ඇත. අදාළ ආයතනවලට අන්තර්ජාලය ඔස්සේ, ඕනෑම ස්ථානයක සිට ආරක්ෂිතව සහ ස්වාධීනව තොරතුරු ඉදිරිපත් කිරීමේ පහසුකම හිමිවේ. මෙය දත්ත රැස්කිරීමේ ක්රියාවලිය වඩාත් වේගවත්, පිරිවැය-ඵලදායී සහ පරිසර හිතකාමී කරයි.
ලබාදෙන සියලුම තොරතුරු සංගණන සහ සංඛ්යාලේඛන ආඥාපනත යටතේ පූර්ණ රහස්යභාවයෙන් ආරක්ෂා කෙරේ. තොරතුරු භාවිතා කරන්නේ සංඛ්යානමය කටයුතු සඳහා පමණක් වන අතර කිසිදු පුද්ගල හෝ ආයතන මට්ටමේ තොරතුරක් අනාවරණය නොකෙරේ. තොරතුරු ලබාදීමට අපේක්ෂා කරන සුදුසුකම් ලත් ආයතන දෙපාර්තමේන්තුවේ නිල වෙබ් අඩවියට පිවිස ලියාපදිංචි විය යුතු අතර, අනතුරුව ලබාදෙන විශේෂිත සබැඳිය හරහා මාර්ගගතව තොරතුරු යොමු කළ හැකිය. මෙම නවීන ක්රමවේදය මගින් රටේ ආර්ථික ප්රතිපත්ති සම්පාදනයට සහ ආයෝජන ප්රවර්ධනයට අවශ්ය කාලීන සහ නිවැරදි දත්ත ලබාගැනීම ජාතික සංවර්ධනයට මහඟු පිටුවහලක් වනු ඇත.
