පවතින දේශගුණික විපර්යාස සහ ඉදිරියේදී අපේක්ෂිත එල් නිනෝ (El Niño) කාලගුණික සංසිද්ධිය හේතුවෙන් ශ්රී ලංකාවට ඇති විය හැකි බලපෑම් කළමනාකරණය කිරීම සඳහා විශේෂ අමාත්ය අනුකමිටුවක් සහ නිලධාරී කමිටුවක් පත් කිරීමට අමාත්ය මණ්ඩලය අනුමැතිය ලබා දී ඇත.
විද්යාත්මක පුරෝකථනයන්ට අනුව, මෙම වසරේ අගභාගයේ සිට එල් නිනෝ බලපෑම හේතුවෙන් අසාමාන්ය වැසි රටාවන්, අධික උෂ්ණත්වය, නියඟය සහ ගංවතුර තත්ත්වයන් ඇතිවීමේ අවදානමක් පවතී. මෙයින් ආර්ථික සහ සමාජීය ක්ෂේත්රවලට විය හැකි බලපෑම් අවම කර ගැනීම රජයේ අරමුණයි.
මෙම ජාතික වැඩසටහන යටතේ ජල, විදුලි සහ ආහාර අර්බුද කළමනාකරණය සඳහා කෙටි, මධ්යම සහ දිගුකාලීන සැලසුම් සකස් කිරීමටත්, රාජ්ය ආයතන, පෞද්ගලික අංශය සහ ප්රජා සංවිධාන අතර සම්බන්ධීකරණය ශක්තිමත් කිරීමටත් නියමිතය.
අමාත්ය අනුකමිටුවේ සාමාජිකයින් ලෙස පරිසර අමාත්ය දම්මික පටබැඳි මහතා සභාපතිත්වය දරනු ලබන අතර, කෘෂිකර්ම අමාත්ය කේ.ඩී. ලාල් කාන්ත, වගා හා ග්රාමීය යටිතල පහසුකම් අමාත්ය සමන්ත විද්යාරත්න, වරාය, සිවිල් ගුවන් සේවා සහ බලශක්ති අමාත්ය අනුර කරුණාතිලක, වෙළෙඳ හා ආහාර සුරක්ෂිතතා අමාත්ය වසන්ත සමරසිංහ සහ නිවාස හා ජල සැපයුම් අමාත්ය සුසිල් රණසිංහ යන මහත්වරුන් ඇතුළත් වේ.
මෙම අමාත්ය අනුකමිටුවට අමතරව, ජනාධිපති ලේකම්වරයාගේ සභාපතිත්වයෙන් යුත් නිලධාරී කමිටුවක් ද පත් කර ඇති අතර, එයට අදාළ අමාත්යාංශවල ලේකම්වරුන්, වාරිමාර්ග, කෘෂිකර්ම, කාලගුණවිද්යා සහ ආපදා කළමනාකරණ ආදී ප්රධාන ආයතනවල නිලධාරීන් ඇතුළත් වේ. මෙම ඒකාබද්ධ ක්රියාමාර්ග හරහා එල් නිනෝ අවදානමෙන් ජනතාව සහ සම්පත් ආරක්ෂා කර ගැනීමට රජය අපේක්ෂා කරයි.
