පසුගිය ආර්ථික අර්බුදය හමුවේ අතරමඟ නතර වී තිබූ බලශක්ති ව්යාපෘති සියල්ල යළි ආරම්භ කිරීමට පියවර ගන්නා ලෙස ජනාධිපති අනුර කුමාර දිසානායක මහතා බලශක්ති අමාත්යාංශයේ නිලධාරීන්ට උපදෙස් ලබා දී තිබේ.
ජනාධිපති කාර්යාලයේදී පැවැති බලශක්ති අමාත්යාංශයේ 2026 වසරේ අයවැය ව්යාපෘතිවල ප්රගතිය සමාලෝචනය සහ 2027 අයවැය පූර්ව සාකච්ඡාවේදී ජනාධිපතිවරයා මෙම උපදෙස් ලබා දුන්නේය.
ජපාන ජාත්යන්තර සහයෝගිතා නියෝජිතායතනයේ (JICA) ආධාර යටතේ ආරම්භ කර නතර වී තිබූ ව්යාපෘති යළි ආරම්භ කිරීම සහ ඒ සඳහා 2027 අයවැයෙන් ප්රතිපාදන වෙන් කිරීම පිළිබඳව දීර්ඝව සාකච්ඡා කෙරිණි.
දෙල්ෆ්, අනලතිව් සහ නයනතිවු දූපත්වල ක්රියාත්මක දෙමුහුන් පුනර්ජනනීය බලශක්ති පද්ධති ව්යාපෘතියේ ප්රගතිය සමාලෝචනය කළ ජනාධිපතිවරයා, එම දූපත් ‘හරිත බලශක්ති දූපත්’ ලෙස සංවර්ධනය කිරීමට පියවර ගන්නා ලෙස දැනුම් දුන්නේය.
කෙරවලපිටිය සිට කොළඹ වරාය දක්වා දෙවැනි භූගත විදුලි සම්ප්රේෂණ මාර්ගය, සාම්පූර්–කප්පල්තුරෙයි විදුලි සම්ප්රේෂණ ව්යාපෘතිය, නව හබරණ–කප්පල්තුරෙයි විදුලි සම්ප්රේෂණ ව්යාපෘතිය (CEATP), පාදුක්ක 220kV ජාල උපපොළෙහි STATCOM ස්ථාපනය කිරීම සහ වහල මත සූර්ය බලශක්ති ව්යාපෘතියේ ප්රගතිය විමසා බැලීය.
ඛනිජ තෙල් අංශයට අදාළ ව්යාපෘති 14ක් පිළිබඳවද මෙහිදී අවධානය යොමු විය. කොලොන්නාව තෙල් ගබඩා සංකීර්ණයේ නව ටැංකි 06ක් ඉදිකිරීම, මුතුරාජවෙල ඉන්ධන ගබඩා සංකීර්ණයේ නව ටැංකි 02ක් ඉදිකිරීම සහ ඉන්ධන පහසුකම් පුළුල් කිරීම, ටැංකි ප්රතිෂ්ඨාපනය කිරීම සහ කොලොන්නාව 07 වැනි කලාපයේ පිරවුම් පහසුකම් සංවර්ධනය කිරීම ඒ අතර වේ.
මෙම සියලු ව්යාපෘති නියමිත කාලසීමාව තුළ සම්පූර්ණ කර ජනතාවට කඩිනමින් ප්රතිලාභ ලබා දීමේ වැදගත්කම ජනාධිපතිවරයා අවධාරණය කළේය. මෙම සාකච්ඡාව සඳහා බලශක්ති ඇමැති අනුර කරුණාතිලක මහතා ඇතුළු අමාත්යාංශ නිලධාරීන් සහ ජනාධිපති කාර්යාලයේ ඉහළ පෙළේ නිලධාරීන් පිරිසක් එක්ව සිටියහ.
