ලෝක වෙළෙඳපොළේ පවතින අස්ථාවරත්වය හේතුවෙන් මෙරටට මාසිකව ඉන්ධන ආනයනය සඳහා වැයවන මුදල ඇමෙරිකානු ඩොලර් මිලියන 520 ඉක්මවා ගොස් ඇති බව ලංකා ඛනිජ තෙල් සංස්ථා වාර්තා පෙන්වා දෙයි. මීට පෙර මේ සඳහා මාසිකව වැය වී ඇත්තේ ඩොලර් මිලියන 100ක මුදලකි. ඉන්ධන ආනයන වියදම් ඉහළ යාමට ප්රධානතම හේතුව වී ඇත්තේ ඩීසල් මිල ශීඝ්රයෙන් වැඩි වීමයි. ඒ අනුව පෙබරවාරි මාසයේ ඩොලර් 88.8ක් වූ ඩීසල් බැරලයක මිල මාර්තු මාසයේදී ඩොලර් 191.7ක් සහ අප්රේල් මාසයේදී ඩොලර් 199.7ක් දක්වා ඉහළ ගොස් තිබේ. මැයි මාසයේදී මිලෙහි යම් අඩුවක් පෙන්නුම් කළද, මාසය අවසාන වන විට ලෝක වෙළෙඳපොළේ මිල ගණන් නැවතත් ශීඝ්රයෙන් ඉහළ යනු ඇතැයි ඉන්දියාව ඇතුළු රටවල් රැසක් පුරෝකථනය කර ඇත.
මෙවැනි දැඩි අසීරු තත්ත්වයක් යටතේ වුවද, පාරිභෝගිකයා ආරක්ෂා කිරීම වෙනුවෙන් ඩීසල් ලීටරයකට රුපියල් 100ක සහ පෙට්රල් ලීටරයකට රුපියල් 20ක සහනයක් තවදුරටත් ලබාදීමට රජය කටයුතු කරමින් සිටින බව ඛනිජ තෙල් නීතිගත සංස්ථාවේ සභාපති ජේ. ඩී. රාජකරුණා මහතා සඳහන් කළේය. බහුලවම භාවිත වන ඩීසල් සඳහා ලබාදෙන මෙම සහනය වෙනුවෙන් පමණක් රජය මාසිකව රුපියල් බිලියන 57ක දැවැන්ත වියදමක් දරන බව ද සභාපතිවරයා වැඩිදුරටත් පැවසීය.
