ඇමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පින් අතර බෙයිජිං නුවරදී පැවැති දෙදින ඉහළ පෙළේ සාකච්ඡාවලින් අනතුරුව, ඇමෙරිකානු දූත පිරිස ආපසු එරට බලා පැමිණීමට පෙර අතිශය අසාමාන්ය ආරක්ෂක පියවරක් අනුගමනය කර තිබේ. ධවල මන්දිර නිලධාරීන්, ආරක්ෂක අංශ සහ ඔවුන් සමඟ ගිය ඇමෙරිකානු මාධ්යවේදීන් වෙත චීන බලධාරීන් විසින් ලබාදුන් සියලුම දෑ ‘Air Force One’ ජනාධිපති නිල ගුවන් යානයට ගොඩවීමට පෙර ගුවන් තොටුපළේ තිබූ කුණු කූඩයකට දමා විනාශ කර ඇති බව විදෙස් මාධ්ය වාර්තා කරයි.
“චීනයෙන් ලැබුණු කිසිදු දෙයකට ගුවන් යානයට ඇතුළු වීමට අවසර නැත” යනුවෙන් පනවා තිබූ දැඩි නිල නියෝගය මත චීනයෙන් ලැබුණු ත්යාග, සමරු සටහන්, මාධ්ය හැඳුනුම්පත්, ලාංඡන මෙන්ම සන්නිවේදනය සඳහා භාවිත කළ තාවකාලික ජංගම දුරකථන (Burner phones) සියල්ල ගුවන් යානයේ පඩිපෙළ අසල තිබූ කුණු කූඩයකට දමා ඇත. චීනයේ සයිබර් නිරීක්ෂණ සහ ඔත්තු බැලීමේ හැකියාවන් කෙරෙහි පවතින දැඩි අවිශ්වාසය හේතුවෙන් ඇමෙරිකානු බුද්ධි අංශ මෙම පියවර ගෙන ඇති අතර, චීනය ලබාදෙන විද්යුත් උපකරණ හෝ වෙනත් දෑ හරහා දත්ත සොරකම් කිරීම (Malware) හෝ පුද්ගලයන් ලුහුබැඳීම (Tracking) සිදු කළ හැකි බවට ඔවුහු සැක කරති.
මෙම ආරක්ෂක පියවර සංචාරය ආරම්භයේ සිටම ක්රියාත්මක වී ඇති අතර ට්රම්ප්ගේ දූත පිරිස සිය පෞද්ගලික විද්යුත් උපකරණ කිසිවක් චීනයට රැගෙන විත් නොමැත. ප්රසිද්ධියේ නායකයන් දෙදෙනා මිත්රශීලීව අදහස් දැක්වුවද, තිරය පිටුපස වොෂින්ටනය සහ බෙයිජිං අතර පවතින දැඩි භූ-දේශපාලනික අවිශ්වාසය මෙම සිදුවීමෙන් මනාව පැහැදිලි වන බව දේශපාලන විශ්ලේෂකයෝ පවසති.
