ශ්රී ලංකාවට ඊසාන දෙසින් පිහිටි අඩු පීඩන කලාපය තවදුරටත් පවතින බැවින්, ඉදිරි දින කිහිපය තුළත් දිවයිනේ වැසි සහ සුළං තත්ත්වය පවතින බව කාලගුණ විද්යා දෙපාර්තමේන්තුව පවසයි. අද (15) රාත්රියේ ද බස්නාහිර සහ සබරගමුව ඇතුළු පළාත් කිහිපයකට මිලිමීටර් 100 ඉක්මවූ තද වැසි ඇතිවිය හැකි බවට අනාවැකි පළ කර ඇත. පසුගිය පැය 24 තුළ වැඩිම වර්ෂාපතනය කුලියාපිටියෙන් (මි.මී. 193) වාර්තා වූ අතර, අවිස්සාවේල්ල, වේයන්ගොඩ සහ කිරිඳිවැල යන ප්රදේශවලට ද මිලිමීටර් 160 ඉක්මවූ තද වැසි ඇදහැලී තිබේ.
අත්තනගලු ඔයේ දූනමලේ ප්රදේශයට මිලිමීටර් 176ක වර්ෂාපතනයක් ලැබීමත් සමඟ ගම්පහ, මිනුවන්ගොඩ, ජාඇල සහ වත්තල ඇතුළු පහත්බිම් ප්රදේශවලට සුළු ගංවතුර අවදානමක් පවතින බව වාරිමාර්ග දෙපාර්තමේන්තුව නිවේදනය කරයි. එමෙන්ම කුඩා ගඟ සහ මගුර ගඟ ආශ්රිත බුලත්සිංහල, මදුරාවල සහ පාලින්දනුවර ප්රදේශවලට ද පැය 48ක සුළු ගංවතුර අනතුරු ඇඟවීමක් නිකුත් කර ඇත. කළු ගඟේ මිල්ලකන්ද ජල මාපාංකය මීටර 7ක් ලෙස සටහන් වී ඇති අතර, කුකුලේගඟ ජලාශයේ දොරටු විවෘත කිරීම නිසා බුලත්සිංහල – මෝල්කාව ප්රධාන මාර්ගය ස්ථාන කිහිපයකින් යටවී ගමනාගමනයට බාධා එල්ල වී තිබේ.
පවතින අයහපත් කාලගුණය හේතුවෙන් දිස්ත්රික්ක 13කට ‘අදියර 1’ යටතේ සහ දිස්ත්රික්ක 6කට ‘අදියර 2’ යටතේ නායයෑම් අනතුරු ඇඟවීම් නිකුත් කර ඇති අතර, ප්රධාන ජලාශ 21ක් සහ මධ්ය පරිමාණ ජලාශ 19ක් මේ වන විට වාන් දමමින් පවතී. බෙංගාල බොක්ක සහ දිවයින වටා මුහුදු ප්රදේශවල තද සුළං ඇතිවිය හැකි බැවින් මුහුද රළුවීමේ හැකියාව පවතින බව ද කාලගුණ විද්යා දෙපාර්තමේන්තුව වැඩිදුරටත් අවධාරණය කරයි.
