ගෝලීය බොරතෙල් මිල මෙම වසර අවසානය දක්වා බැරලයක් අමෙරිකානු ඩොලර් 80ක පමණ මට්ටමක පවත්වා ගතහොත් ශ්‍රී ලංකාවට උද්ධමනය සාර්ථකව කළමනාකරණය කර ගැනීමට හැකි වනු ඇති බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පවසයි.
ඔස්ට්‍රේලියාවේ සිඩ්නි නුවරදී විදෙස් මාධ්‍ය ආයතනයක් සමඟ පැවති සම්මුඛ සාකච්ඡාවකට එක්වෙමින් ඔහු මෙම අදහස් පළ කර ඇති අතර, කොළඹ කොටස් වෙළෙඳපොළ වෙත ආයෝජන ආකර්ෂණය කර ගැනීමේ අරමුණින් ඔහු මෙම සංචාරයේ නිරතව සිටියි.
මෙම වසර අවසානය දක්වා තෙල් මිල ඩොලර් 80ක පමණ මට්ටමක පැවතුනහොත් තත්ත්වය පාලනය කරගත හැකි වුවද, යම් අනපේක්ෂිත වෙනසක් සිදු වුවහොත් එය අභියෝගයක් වනු ඇත. මේ වසරේ දෙවන භාගයේදී සහ ලබන වසරට පිවිසීමේදී ශ්‍රී ලංකාවේ උද්ධමනය මහ බැංකුවේ 5% ඉලක්කය කරා ක්‍රමයෙන් පහළ යනු ඇතැයි අපේක්ෂා කෙරේ. දැඩි මූල්‍ය කොන්දේසි සහ ඉහළ මිල ගණන් පැවතියද, ආර්ථික වර්ධනයට දැඩි අහිතකර බලපෑමක් අපේක්ෂා නොකරන අතර, මේ වසරේ දෙවන භාගයේදී ආර්ථික වර්ධන වේගය සියයට 4ත් 5ත් අතර මට්ටමකට මධ්‍යස්ථ වනු ඇතැයි අපේක්ෂා කරයි. ජාත්‍යන්තර මූල්‍ය අරමුදලේ (IMF) සිව් අවුරුදු වැඩසටහන 2027 වසරේ දෙවන භාගයේදී සම්පූර්ණයෙන් අවසන් කිරීමට අපේක්ෂිත අතර, එහි මීළඟ සමාලෝචනය මේ වසරේ නොවැම්බර් හෝ දෙසැම්බර් මාසයේදී පමණ අපේක්ෂා කෙරේ.
