ශ්රී ලංකාවේ ඩිජිටල් පරිවර්තනය සාර්ථක කර ගැනීම සඳහා අවශ්ය මානව සම්පත් සංවර්ධනය සහ ආයතනික ව්යුහය ශක්තිමත් කිරීමේ අරමුණින්, “ඩිජිටල් පරිවර්තනය පිළිබඳ සංවර්ධන හවුල්කරුවන්ගේ” (Development Partner Working Group on Digital Transformation) සමාරම්භක සාකච්ඡාව පසුගියදා (13) පැවැත්විණි.
ඩිජිටල් ආර්ථික නියෝජ්ය අමාත්ය එරංග වීරරත්න මහතා සහ ශ්රී ලංකාවේ එක්සත් ජාතීන්ගේ නේවාසික සම්බන්ධීකාරක මාක්-ඇන්ඩ්රේ ෆ්රැන්චේ මහතාගේ සම-සභාපතිත්වයෙන් පැවැති මෙම සාකච්ඡාව සඳහා ඩිජිටල් ආර්ථික අමාත්යාංශයේ ලේකම් වරුණ ශ්රී ධනපාල මහතා ඇතුළු ජාත්යන්තර සංවර්ධන හවුල්කරුවන් සහ එක්සත් ජාතීන්ගේ නියෝජිතයින් පිරිසක් එක්ව සිටියහ.
මෙම සාකච්ඡාවේදී රාජ්ය සේවා ඩිජිටල්කරණය හරහා මහජනතාවට පහසුවෙන් ප්රවේශ විය හැකි ඩිජිටල් පොදු සේවාවන් නිර්මාණය කිරීමටත්, රජය සහ ජාත්යන්තර සංවර්ධන හවුල්කරුවන් අතර සම්බන්ධතාවය ශක්තිමත් කිරීමටත් තීරණය විය. එමෙන්ම ඩිජිටල් සේවා සැපයෙන රාජ්ය ආයතන ශක්තිමත් කිරීම සහ නිලධාරීන්ගේ ධාරිතාව ඉහළ නැංවීම සඳහා ක්රමවත් පුහුණු වැඩසටහන් ක්රියාත්මක කිරීමේ වැදගත්කම පිළිබඳවද මෙහිදී අවධානය යොමු කෙරිණි.
සෑම ශ්රී ලාංකිකයෙකුටම සමාන අවස්ථා හිමිවන, සියලු දෙනා ඇතුළත් කරගත් තිරසාර ඩිජිටල් අනාගතයක් ගොඩනැගීම වෙනුවෙන් මෙම ඒකාබද්ධ ප්රයත්නය අඛණ්ඩව ක්රියාත්මක කිරීමට අදාළ පාර්ශ්වයන් එකඟතාව පළ කර ඇත.
