ශ්රී ලංකාවේ රාජ්ය අංශයේ අල්ලස් හා දූෂණ විරෝධී ක්රියාමාර්ග මෙන්ම ආයතනික සුපිළිපන්භාවය සහ විනිවිදභාවය ශක්තිමත් කිරීමේ අරමුණින්, ISO 37001 අල්ලස් විරෝධී කළමනාකරණ පද්ධතිය පිළිබඳ දෙදින වැඩමුළුවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්රධානත්වයෙන් ශ්රී ලංකා පදනම් ආයතනයේදී ඊයේ (18) ආරම්භ කෙරිණි.
ජනාධිපති ලේකම් කාර්යාලය, එක්සත් ජාතීන්ගේ කාර්මික සංවර්ධන සංවිධානය (UNIDO) සහ යුරෝපා සංගමය ඒකාබද්ධව සංවිධානය කර ඇති මෙම වැඩමුළුව සඳහා අමාත්යාංශ, දෙපාර්තමේන්තු, බැංකු සහ පෞද්ගලික සමාගම් ප්රධානීහු ඇතුළු ජ්යෙෂ්ඨ නිලධාරීහු පිරිසක් සහභාගී වී සිටිති. දූෂණ අවදානම් වැළැක්වීම, අභ්යන්තර පාලන ක්රමවේද වැඩිදියුණු කිරීම සහ රාජ්ය මෙන්ම පෞද්ගලික අංශය තුළ සදාචාරාත්මක පාලන සංස්කෘතියක් ස්ථාපිත කිරීම මෙහි මූලික අරමුණ වී තිබේ.
