ශ්රී ලංකා නාවික හමුදාවේ 263 වැනි බඳවා ගැනීමට අයත් නිත්ය හා ස්වේච්ඡා ආධුනික නාවිකයින් 373 දෙනෙකු සිය මූලික පුහුණුව සාර්ථකව නිම කර විසිර යාමේ පෙළපාලිය 2026 අප්රේල් මස 27 වන දින ගාලු දිස්ත්රික්කයේ බූස්ස පිහිටි ශ්රී ලංකා නාවික නෞකා නිපුණ ආයතනයේදී උත්කර්ෂවත් අන්දමින් පැවැත්විණි. මෙම විසිර යාමේ පෙළපාලියේ ප්රධාන ආරාධිත අමුත්තා ලෙස නාවික හමුදා සෞඛ්ය සේවා අධ්යක්ෂ ජනරාල්, රියර් අද්මිරාල් ප්රසාද් මාරඹේ මහතා සහභාගී වූ අතර, නාවික හමුදා සම්ප්රදායානුකූලව ආධුනික නාවිකයින්ගේ ආචාරය පිළිගැනීම ද එහිදී සිදු විය.
මූලික පුහුණුව තුළ සුවිශේෂී දක්ෂතා දැක්වූ ආධුනික නාවිකයින් සඳහා සම්මාන පිරිනැමීම මෙහිදී සිදු වූ අතර, 263 වැනි බඳවා ගැනීමේ දක්ෂතම ආධුනික නාවිකයා ලෙස ආධුනික නාවික ඩබ්ලිව්.එම්.එස්.එන්. වීරසේකර සම්මානය දිනා ගන්නා ලදී. මීට අමතරව සියලුම විෂයන් සඳහා වැඩිම ලකුණු ලාභියා ලෙස ආධුනික නාවික එස්.එච්. දිල්ශානිත්, දක්ෂතම ක්රීඩකයා ලෙස ආධුනික නාවික එම්.එම්.බී.එන්. මාපා සහ දක්ෂතම ක්රීඩිකාව ලෙස ආධුනික නාවික ඒ.එම්.එන්.ඒ. අධිකාරිත් සම්මානයට පාත්ර වූහ. දක්ෂතම ඉලක්කකරු ලෙස ආධුනික නාවික ඒ.එම්.ඒ.ආර්. බණ්ඩාර සහ දක්ෂතම ඉලක්කකාරිය ලෙස ආධුනික නාවික එන්.එල්.ඩී.ඩී.එස්. ලියනගේ සම්මාන ලැබූ අතර, දක්ෂතම අංශයට හිමි කුසලානය ‘අනුල’ අංශය විසින් හිමිකර ගන්නා ලදී.
විසිර යන නාවිකයින් අමතමින් රියර් අද්මිරාල් ප්රසාද් මාරඹේ මහතා සඳහන් කළේ, මාතෘ භූමියේ ජාතික ආරක්ෂාව තහවුරු කිරීමේ ගෞරවනීය වගකීමක් නව නාවිකයින් වෙත පැවරෙන බවයි. නූතන තාක්ෂණය සමඟ යාවත්කාලීන වෙමින් වෘත්තීය නිපුණතාවයෙන් යුත් නාවික හමුදාවක් ලෙස රටේ ස්වෛරීභාවය සහ භෞමික අඛණ්ඩතාව ආරක්ෂා කිරීමට කැපවිය යුතු බව ඔහු වැඩිදුරටත් අවධාරණය කළේය. නාවික හමුදා තූර්ය වාදක කණ්ඩායම සහ සංස්කෘතික කණ්ඩායමේ විචිත්රවත් දර්ශනවලින් වර්ණවත් වූ මෙම අවස්ථාවට දකුණු නාවික විධානයේ අණදෙන නිලධාරී රියර් අද්මිරාල් ධම්මික කුමාරවර්ධන මහතා ඇතුළු නාවික හමුදා ජ්යෙෂ්ඨ නිලධාරීන් සහ නවක නාවිකයින්ගේ ඥාතීන් විශාල පිරිසක් සහභාගී වූහ.
