විනිවිදභාවයෙන් යුතු දිගුකාලීන ආයෝජන සඳහා ශ්රී ලංකාවේ දොරටු සෑම විටම විවෘත බවත්, මානව හිමිකම් සහ පරිසරය රකින වගකීම් සහගත ආයෝජන සඳහා රජය උපරිම සහයෝගය ලබා දෙන බවත් අග්රාමාත්ය ආචාර්ය හරිනි අමරසූරිය පවසා තිබේ.
එක්සත් ජාතීන්ගේ ගෝලීය සංසදය සහ ශ්රී ලංකා ආයෝජන මණ්ඩලය එක්ව “Forward Faster Now” යන තේමාව යටතේ කොළඹදී සංවිධානය කළ ආසියා-පැසිෆික් කලාපයේ තිරසර සංවර්ධන අරමුණු ඇතුළත් ආයෝජන සංසදයට එක්වෙමින් අග්රාමාත්යවරිය මේ බව සඳහන් කළාය.
අග්රාමාත්යවරිය කළ ප්රකාශයේ විශේෂ කරුණු අතර, සංවර්ධනය වෙමින් පවතින රටවල වාර්ෂික මූල්ය හිඟය ඩොලර් ට්රිලියන 2.5ත් 4ත් අතර වන අතර, ආසියා-පැසිෆික් කලාපයේ පමණක් එම හිඟය ඩොලර් ට්රිලියන 1.5ක් වීම සහ 2030 වන විට මෙම කලාපයේ තිරසාර සංවර්ධන ඉලක්කවලින් 88%ක්ම මගහැරී යාමේ අවදානමක් පැවතීම ඇතුළත් වේ. අභියෝගවලින් පසු ශ්රී ලංකා ආර්ථිකය යළි ස්ථාවර වෙමින් පවතින අතර, 2025 වසරේදී 5%ක ආර්ථික වර්ධනයක් වාර්තා කරමින් දේශීය නිෂ්පාදනය ඩොලර් බිලියන 108.8 දක්වා ඉහළ නංවා ගනිමින් ඒක පුද්ගල ආදායම ඩොලර් 5,000 සීමාව පසු කර ඇත. රජය බලාපොරොත්තු වන්නේ හුදෙක් ලාභය පමණක් අරමුණු කළ ආයෝජන නොව, මානව හිමිකම්, පරිසරය ආරක්ෂා කිරීම, සේවක සුභසාධනය සහ හරිත ප්රවේශයන් සුරක්ෂිත කරන වගකීම් සහගත ආයෝජන වන අතර, ශ්රී ලංකා මහ බැංකුව හඳුන්වා දුන් ‘තිරසාර මූල්ය මාර්ග සිතියම’ සහ ‘හරිත බැඳුම්කර රාමුව’ හරහා කාලගුණික අභියෝගවලට මුහුණ දීමට සහ සුළු හා මධ්ය පරිමාණ ව්යාපාරිකයන්ට මූල්ය පහසුකම් සැලසීමට පියවර ගෙන ඇත.
මෙම සංසදය සඳහා එක්සත් ජාතීන්ගේ සහකාර මහ ලේකම් සහ එක්සත් ජාතීන්ගේ ගෝලීය සංසදයේ ප්රධාන විධායක නිලධාරිනී සැන්ඩා ඔජියාම්බෝ මෙනෙවියද සහභාගී වී සිටියාය.
