ශ්‍රී ලංකාවේ අධ්‍යාපන අංශයේ ප්‍රමිතිකරණය සහ වෘත්තීය සංවර්ධනය ශක්තිමත් කිරීමේ අරමුණින් “අධ්‍යාපන කවුන්සිලයක්” (Education Council) පිහිටුවීම සඳහා වන පනත් කෙටුම්පතක් වසරක් ඇතුළත සකස් කර අවසන් කිරීමට අපේක්ෂා කරන බව අග්‍රාමාත්‍ය ආචාර්ය හරිනි අමරසූරිය මෙනවිය පාර්ලිමේන්තුවේදී පැවසුවාය.
විශේෂඥ කමිටු නිර්දේශ මත පදනම්ව මෙම කවුන්සිලය පිහිටුවන අතර, පූර්ව පාසල්, ප්‍රාථමික සහ ද්විතීයික අධ්‍යාපන මට්ටම්වල නියැලෙන අධ්‍යාපන වෘත්තිකයන්ගේ වෘත්තීය සංවර්ධනය, ප්‍රමිතිකරණය, ලියාපදිංචිය සහ නියාමනය මෙහි ප්‍රධාන කාර්යභාරය වේ. ගුරුවරුන් සඳහා වෘත්තීය බලපත්‍ර සහ සහතික කිරීමේ ක්‍රමවේදයක් හඳුන්වා දීමට ද නියමිත අතර, විපක්ෂ මන්ත්‍රී පද්මසිරි බණ්ඩාර මහතා යොමු කළ ප්‍රශ්නයකට පිළිතුරු දෙමින් අගමැතිවරිය අද (07) පාර්ලිමේන්තුවේදී මේ බව සඳහන් කළාය.
