ජිනීවාහි පිහිටි ලෝක බුද්ධිමය දේපළ සංවිධානයේ (WIPO) මූලස්ථානයේදී පැවැති සාමාජික රටවල මහා සභා රැස්වීමේදී (08), ශ්රී ලංකාව නවීන සහ ඇතුළත් බුද්ධිමය දේපළ පද්ධතියක් ගොඩනැගීමට තමා සතු කැපවීම යළි තහවුරු කළේය.
එහිදී අදහස් දක්වමින් ස්විට්සර්ලන්තයේ ශ්රී ලංකා නිත්ය නියෝජිත සුමිත් දසනායක මහතා පෙන්වා දුන්නේ, නවෝත්පාදනය, නිර්මාණශීලිත්වය, වෙළඳාම, තාක්ෂණ හුවමාරුව සහ ඇතුළත් ආර්ථික සංවර්ධනය සඳහා බුද්ධිමය දේපළ පද්ධතියේ වැදගත්කමයි. විශේෂයෙන්ම නව නිපැයුම්කරුවන්, නිර්මාණකරුවන්, ක්ෂුද්ර, කුඩා සහ මධ්ය පරිමාණ ව්යවසායකයින්, කාන්තාවන්, තරුණයන් සහ ශාස්ත්රාලීය ප්රජාව සවිබල ගැන්වීම තුළින් තිරසාර ආර්ථික වර්ධනයක් ළඟා කර ගැනීමට එය දායක වන බව ඔහු අවධාරණය කළේය.
බුද්ධිමය දේපළ ලේඛන ඩිජිටල්කරණය සහ ස්කෑන් කිරීමේ ව්යාපෘතිය 2026 මැයි මාසයේදී සාර්ථකව අවසන් කර ඇති බවත්, ශ්රී ලංකාවේ ජාතික වෙළඳ නාම එකතුව WIPO හි ගෝලීය වෙළඳ නාම දත්ත ගබඩාවට ඇතුළත් කිරීම තුළින් දේශීය වෙළඳ නාමවලට ජාත්යන්තර දෘශ්යතාව ලැබෙන බවත් දසනායක මහතා සඳහන් කළේය.
භූගෝලීය දර්ශක ප්රවර්ධනය කිරීම, ප්රකාශන හිමිකම් රාමුව ශක්තිමත් කිරීම, නවෝත්පාදනයන් දිරිමත් කිරීම, විශ්වවිද්යාල සහ කර්මාන්ත අතර සහයෝගීතාව වර්ධනය කිරීම සහ පර්යේෂණ හා සංවර්ධන කටයුතු සඳහා සහය දැක්වීම ශ්රී ලංකාවේ අනාගත ප්රමුඛතා බව ද ඔහු ප්රකාශ කළේය. WIPO සංවිධානය ලබා දෙන තාක්ෂණික සහය අගය කළ නිත්ය නියෝජිතවරයා, එම සංවිධානයේ සංවර්ධන න්යාය පත්රය ක්රියාත්මක කිරීමට ශ්රී ලංකාවේ පූර්ණ සහාය හිමිවන බව ද වැඩිදුරටත් සඳහන් කළේය.
