අමෙරිකා එක්සත් ජනපදයේ The Church of Jesus Christ of Latter-day Saints ආයතනයට අනුබද්ධ Latter-day Saint Charities සංවිධානය විසින් ශ්‍රී ලංකාවේ පිළිකා රෝගීන්ගේ ප්‍රයෝජනය සඳහා රුපියල් මිලියන 330ක් වටිනා පිළිකා නාශක ඖෂධ තොගයක් සෞඛ්‍ය හා ජනමාධ්‍ය අමාත්‍යාංශයට පරිත්‍යාග කර තිබේ.
එම ඖෂධ තොගය සෞඛ්‍ය හා ජනමාධ්‍ය අමාත්‍යාංශයේදී නිල වශයෙන් භාරදීම සිදුකර ඇති අතර, Oxaliplatin එන්නත්, Abiraterone පෙති සහ Methotrexate එන්නත් ඇතුළු අත්‍යවශ්‍ය පිළිකා නාශක ඖෂධ වර්ග රැසක් ඊට ඇතුළත් වේ.
මෙම පරිත්‍යාගය භාරදීම Latter-day Saint Charities සංවිධානය වෙනුවෙන් එහි ආසියානු කලාපීය අධ්‍යක්ෂ Lui Wing Chung Mickey මහතා සහ ආසියානු කලාපීය කළමනාකාරිනී Apapohn Pinsakol Saengsin මහත්මිය විසින් සිදුකර තිබේ. එම අවස්ථාවට සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතාද එක්ව සිටියේය.
මේ අතර, ශ්‍රී ලංකාවේ පුනරුත්ථාපන රෝහල් සහ මධ්‍යස්ථානවල ප්‍රතිකාර ලබන සුෂුම්නාව ආශ්‍රිත ආබාධ සහිත රෝගීන් වෙනුවෙන් විශේෂිත රෝද පුටු 600ක් පරිත්‍යාග කිරීම සඳහා සෞඛ්‍ය හා ජනමාධ්‍ය අමාත්‍යාංශය සහ අදාළ අමෙරිකානු සංවිධානය අතර අවබෝධතා ගිවිසුමකටද අත්සන් තබා තිබේ.
මෙම ඖෂධ පරිත්‍යාගය වෙනුවෙන් ශ්‍රී ලංකා රජයේ සහ ජනතාවගේ කෘතඥතාව පළ කරමින් සකස් කළ විශේෂ සහතිකයක්ද සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා වෙනුවෙන් අමාත්‍යාංශ ලේකම්වරයා විසින් එම සංවිධානයේ ආසියානු කලාපීය අධ්‍යක්ෂවරයා වෙත පිරිනමා ඇත.
