වනජීවී සංරක්ෂණ දෙපාර්තමේන්තුවේ ක්ෂේත්‍ර රාජකාරි වඩාත් කාර්යක්ෂම කිරීම සහ රට තුළ පවතින අලි-මිනිස් ගැටුම පාලනය කිරීම අරමුණු කරගනිමින්, III වන ශ්‍රේණියේ වනසත්ත්ව නියාමක නිලධාරීන් 229 දෙනෙකු සඳහා පත්වීම් ලිපි ප්‍රදානය කිරීම බත්තරමුල්ල පරිසර අමාත්‍යාංශ පරිශ්‍රයේදී සිදු කෙරිණි. පරිසර අමාත්‍යවරයාගේ ප්‍රධානත්වයෙන් සහ පරිසර නියෝජ්‍ය අමාත්‍යවරයාගේ සහභාගීත්වයෙන් පැවැති මෙම උත්සවයේදී, තරග විභාගයක් සහ සම්මුඛ පරීක්ෂණ මාලාවක් ඔස්සේ ඉහළම සුදුසුකම් සපුරාගත් පිරිමි නිලධාරීන් 223 දෙනෙකු සහ කාන්තා නිලධාරිනියන් 06 දෙනෙකු සඳහා මෙලෙස පත්වීම් ලබා දෙන ලදී.
වනසත්ත්ව හා වෘක්ෂලතා ආරක්ෂක ආඥාපනතේ නීතිමය බලතල ක්‍රියාත්මක වන මූලික කණිෂ්ඨ ක්ෂේත්‍ර නිලධාරී බලකාය වන මෙම නිලධාරීන් වෙත ගම්වදින වනඅලි නැවත වනාන්තර වෙත පලවා හැරීම, අලි වැට නඩත්තුව හා පාලනය, සහ ගැටුම් පවතින ප්‍රදේශවල ජනජීවිත හා දේපළ ආරක්ෂා කිරීමේ වගකීම පැවරේ. මීට අමතරව, රක්ෂිත ප්‍රදේශවල අනවසර ඇතුළුවීම්, වනසතුන් දඩයම් කිරීම, මදු සහ විදුලි රැහැන් ඇටවීම් වැටලීම මෙන්ම ජාතික වනෝද්‍යාන සහ අභයභූමි ආවරණය වන පරිදි පැය 24 පුරා මුර සංචාරවල යෙදීම සහ උගුල්වලට හසුවන වනසතුන් ආරක්ෂිතව මුදාගෙන ප්‍රතිකාර සඳහා යොමු කිරීමද ඔවුන්ගේ ප්‍රධාන රාජකාරි අතර වේ.
පත්වීම් ලැබූ සියලුම නිලධාරීන් රන්දෙණිගල, රිටිගල, මාදුරුඔය සහ ගිරිතලේ යන වනජීවී පුහුණු මධ්‍යස්ථාන කේන්ද්‍ර කරගනිමින් මාස හයක විධිමත් පූර්ණ නේවාසික පුහුණු කාලසීමාවකට යටත් කෙරේ. මෙම පුහුණුව සාර්ථකව නිම කරන නිලධාරීන් ස්ථිර සේවයට අනුයුක්ත කරමින්, දිවයින පුරා පවතින දැඩි අලි-මිනිස් ගැටුම් අවම කිරීමේ විශේෂ මෙහෙයුම් සහ වන සම්පත් ආරක්ෂා කිරීමේ සක්‍රීය රාජකාරි සඳහා ක්ෂේත්‍රගත කිරීමට නියමිතය.
