දිවයිනට බලපා ඇති අධික වර්ෂාපතනය හේතුවෙන් මේ වන විට ප්රධාන ජලාශ 21ක් සහ මධ්ය පරිමාණ ජලාශ 19කට අධික සංඛ්යාවක් වාන් දමමින් පවතින බව වාරිමාර්ග දෙපාර්තමේන්තුව නිවේදනය කරයි. අද (15) පෙරවරු 6.00 වන විට වාර්තා වූ දත්තවලට අනුව ජලාශ රැසක වාන් දොරටු විවෘත කර ඇති බැවින් පහත්බිම්වල වෙසෙන ජනතාව දැඩි විමසිල්ලෙන් පසුවිය යුතුය.
අනුරාධපුර දිස්ත්රික්කයේ රාජාංගනය, නාච්චිදූව සහ යාන්ඔය ද, හම්බන්තොට දිස්ත්රික්කයේ ලුණුගම්වෙහෙර, තිස්ස වැව, වීරවිල සහ වෙහෙරගල ද මේ වන විට වාන් දමන ප්රධාන ජලාශ අතර වේ. මීට අමතරව කුරුණෑගල දිස්ත්රික්කයේ දැදුරුඔය, ඉගිණිමිටිය, තබ්බෝව, මන්නාරම යෝධ වැව සහ මහනුවර වෑමැඩිල්ල ඇතුළු ජලාශ රැසක ජල මට්ටම උපරිම මට්ටමට පැමිණ තිබේ.
විශේෂයෙන්ම රාජාංගනය ජලාශයේ වාන් දොරටු 2ක් අඩි 3 බැගින් ද, ලුණුගම්වෙහෙර ජලාශයේ දොරටු 6ක් ද විවෘත කර කිරිඳි ඔයට ජලය මුදාහැරේ. තබ්බෝව ජලාශයේ වාන් දොරටු 12ක්ම විවෘත කර ඇති අතර, වෙහෙරගල ජලාශයෙන් මැණික් ගඟටත්, අලිකොටආර ජලාශයෙන් කිරිඳි ඔයටත් ජලය නිකුත් කෙරේ. දැදුරුඔය ජලාශයෙන් තත්පරයට ඝන අඩි 1,400ක ජල ප්රමාණයක් නිකුත් කෙරෙන බැවින් අවට ප්රදේශවලට ගංවතුර අවදානමක් පවතී.
මෙම ජල ප්රමාණයන් මුදාහැරීම හේතුවෙන් කලා ඔය, කිරිඳි ඔය, මැණික් ගඟ සහ දැදුරු ඔය ඇතුළු ගංගා සහ ඇළ මාර්ග පෝෂිත වන පහත්බිම් ප්රදේශවල ජනතාව ගංවතුර අවදානම පිළිබඳව දැඩි අවධානයෙන් පසුවිය යුතුය. අනවශ්ය ලෙස ජලාශ සහ ගංගා පරිශ්රවලට ඇතුළු වීමෙන් වළකින ලෙස වාරිමාර්ග දෙපාර්තමේන්තුව ජනතාවට වැඩිදුරටත් දැනුම් දෙයි.
