ශ්රී ලංකාවේ ලෝක ප්රකට ස්වාභාවික මිනිරන් කර්මාන්තය ගෝලීය වෙළෙඳපොළ සඳහා ඉහළ වටිනාකමක් සහිත නිෂ්පාදන බවට පත් කිරීමේ අරමුණින්, කර්මාන්ත හා ව්යවසායකත්ව සංවර්ධන අමාත්යාංශය සහ ශ්රී ලංකා අපනයන සංවර්ධන මණ්ඩලය (EDB) ඒකාබද්ධව බෝගල ග්රැෆයිට් ලංකා පීඑල්සී වෙත මෑතකදී නිරීක්ෂණ චාරිකාවක නිරත වී තිබේ.
මෙහිදී මීටර් 140කට වැඩි ගැඹුරකින් යුත් භූගත මිනිරන් කැණීම් කටයුතු මෙන්ම, ලෝපස් නිස්සාරණයේ සිට සැකසීම, ශ්රේණිගත කිරීම, පිරිසිදු කිරීම සහ අපනයනය සඳහා සූදානම් කිරීම දක්වා වූ සමස්ත මිනිරන් වටිනාකම් දාමය පිළිබඳව නිලධාරීන් අවබෝධයක් ලබාගෙන ඇත. ඉහළ කාබන් සංශුද්ධතාවය සහ සුවිශේෂී ස්ඵටිකරූපී ව්යුහය හේතුවෙන් ගෝලීය වෙළෙඳපොළ තුළ ශ්රී ලංකික මිනිරන් සඳහා ඉහළ ඉල්ලුමක් පවතින බව පෙන්වා දී තිබේ.
අමු මිනිරන් අපනයනයෙන් ඔබ්බට ගොස් උසස් සැකසුම්, තාක්ෂණය සහ පර්යේෂණ මත පදනම් වූ ඉහළ අගයක් එකතු කළ නිෂ්පාදන වෙත යොමුවීම ජාතික අපනයන සංවර්ධන සැලැස්ම (NEDP) 2026–2030 සමඟද සමපාත වන බව සඳහන් වේ. මෙම ක්ෂේත්රය දියුණු කිරීම සඳහා රාජ්ය ආයතන, කර්මාන්ත ක්ෂේත්රය, පර්යේෂණ ආයතන සහ ජාත්යන්තර හවුල්කරුවන් අතර ශක්තිමත් සහයෝගීතාවක අවශ්යතාවය මෙහිදී අවධාරණය කෙරුණු අතර, බෝගල ග්රැෆයිට් ලංකා පීඑල්සී හි කළමනාකාර අධ්යක්ෂ හා ප්රධාන විධායක නිලධාරී අමිල ප්රසන්න ජයසිංහ ඇතුළු කණ්ඩායමේ සේවයද මෙහිදී ඇගයීමට ලක්විය.
