ලෝකයම ආහාර සුරක්ෂිතතාව පිළිබඳ දැඩි අවධානයකින් පසුවන යුගයක, ශ්රී ලංකාවේ සරුසාර කෘෂිකාර්මික භූමි බරපතල අර්බුදයකට ලක් කරමින් දුම්කොළ වගාව ව්යාප්ත වීම පිළිබඳව විද්වතුන් සහ පරිසරවේදීන් අනතුරු අඟවති. ‘කෘෂිකර්මය’ යනුවෙන් ලේබල් අලවාගෙන පැමිණියද, සැබවින්ම මෙය පස නිසරු කරමින්, වනාන්තර විනාශ කරමින් සහ ගොවි ජනතාව ණය උගුලකට හිර කරමින් පවත්වාගෙන යන “මිනිමරු ව්යාපාරයක්” බවට විවේචන එල්ල වෙමින් තිබේ.
ලෝක සෞඛ්ය සංවිධානයේ දත්ත අනුව වසරකට මිනිස් ජීවිත මිලියන 5.5ක් බිලිගන්නා දුම්කොළ කර්මාන්තය, තම පැවැත්ම උදෙසා ශ්රී ලාංකීය ගොවීන්ව විවිධ ණය යෝජනා ක්රම සහ සහතික මිලක් පෙන්වා රවටා ගෙන ඇති බව හෙළිවේ. මෙම වගාව මගින් සිදුවන ප්රධාන අසාධාරණයන් කිහිපයක් මෙසේය:
– භූමි විනාශය:
දුම්කොළ ශාකය පසෙහි ඇති සාරය ඉතා වේගයෙන් උරා ගන්නා බැවින්, වාර කිහිපයකින් පසුව එම භූමිය කිසිදු බෝගයකට නුසුදුසු මුඩු බිමක් බවට පත්වීම.
-පාරිසරික විනාශය:
දුම්කොළ වේලීම සඳහා දැව අවශ්ය වීම හේතුවෙන් සිදුවන මහා පරිමාණ වන විනාශය සහ විෂ රසායනික කෘමිනාශක මගින් භූගත ජලය අපවිත්ර වීම.
– ගොවියාගේ රෝගී තත්ත්වය:
වගා කටයුතුවලදී නිරන්තරයෙන් නිරාවරණය වන අධිවිෂ කෘමිනාශක නිසා ගොවීන්ට චර්ම රෝග, පිළිකා සහ ශ්වසන ආබාධ ඇතිවීම.
මීට අමතරව, අක්රිය දුම්පානය හරහා සමාජයට සිදුකරන හානිය බරපතල බවත්, හෘද රෝග සහ පිළිකා අවදානම 20%-30%කින් ඉහළ යන බවත් වෛද්ය වාර්තා පෙන්වා දෙයි. අප රටේ සීමිත ඉඩම් ප්රමාණය ආහාර බෝග සඳහා යොදා ගත යුතු මොහොතක, මෙවැනි විෂ සහිත වගාවන් සඳහා ජලය, පොහොර සහ මිනිස් ශ්රමය නාස්ති කිරීම ජාතික අපරාධයක් බවට සරසවි සහ බුද්ධිමත් ප්රජාව පෙන්වා දෙති. දුම්කොළ සමාගම්වල දේශපාලන බලපෑම්වලින් මිදී, ගොවීන්ව විකල්ප ආහාර බෝග වෙත යොමු කිරීමේ ජාතික ප්රතිපත්තියක අවශ්යතාවය මේ වන විට දැඩි ලෙස මතුව තිබේ.
