රාජ්‍ය විශ්වවිද්‍යාල තුළ පවතින නේවාසිකාගාර හිඟයට තිරසාර පිළියමක් ලෙස රජය විසින් මෙම වසරේදී දීපව්‍යාප්ත වශයෙන් විශ්වවිද්‍යාල තුළ නේවාසිකාගාර 55ක් ඉදිකිරීමේ ව්‍යාපෘතියක් සඳහා අනුමැතිය ලබා දී ඇත. එහි ආරම්භය සනිටුහන් කරමින් අග්‍රාමාත්‍යවරියගේ ප්‍රධානත්වයෙන් වවුනියාව විශ්වවිද්‍යාලයේදී සිසුන් 200කට නේවාසිකාගාර පහසුකම් ලබා ගතහැකි මහල් 4කින් යුත් නේවාසිකාගාරයකට මුල්ගල තැබීම සිදුකෙරුණු අතර, ඒ සඳහා රජය දරා ඇති මුදල රුපියල් මිලියන 231කට අධිකය.
මෙම ව්‍යාපෘතිය හරහා වවුනියාව විශ්වවිද්‍යාලය තුළ සිසුන් 1,200කට පමණ සරිලන නේවාසිකාගාර 04ක් ගොඩනැගීමට නියමිත අතර, රාජ්‍ය විශ්වවිද්‍යාල තුළ සිටින සිසුන් 16,000කට පමණ පහසුකම් සැපයිය හැකි පරිදි දීපව්‍යාප්තව නේවාසිකාගාර 55ක් ඉදිකිරීමට සැලසුම් කර ඇත. සබරගමුව සහ රජරට විශ්වවිද්‍යාල සඳහා නේවාසිකාගාර 7 බැගින්ද, අග්නිදිග සහ ඌව වෙල්ලස්ස විශ්වවිද්‍යාල සඳහා නේවාසිකාගාර 6 බැගින්ද, නැගෙනහිර විශ්වවිද්‍යාලයට නේවාසිකාගාර 5ක්ද ලබා දීමට නියමිතය. මීට අමතරව, ශ්‍රී ජයවර්ධනපුර, වයඹ සහ රුහුණු විශ්වවිද්‍යාලවලට නේවාසිකාගාර 4 බැගින්ද, යාපනය, මොරටුව, ත්‍රිකුණාමලය සහ ගම්පහ වික්‍රමආරච්චි යන විශ්වවිද්‍යාලවලට නේවාසිකාගාර 2 බැගින්ද මෙම ව්‍යාපෘතිය හරහා හිමිවනු ඇත.
මෙම නව නේවාසිකාගාර ව්‍යාපෘතිය මෑතකදී ශිෂ්‍ය සුබසාධනය වෙනුවෙන් සිදුකරන විශාලතම ආයෝජනය බව සඳහන් කළ අග්‍රාමාත්‍යවරිය, නගරාසන්න ප්‍රදේශවලින් බැහැරව ඇති සහ නව විශ්වවිද්‍යාල සඳහා වැඩි අවධානයක් යොමු කර ඇති බව පැවසුවාය. නවක වදය කිසිසේත්ම අනුමත නොකරන බවත්, විශ්වවිද්‍යාල තුළ ගුණාත්මක අධ්‍යයන ක්‍රියාකාරකම්, අංගසම්පූර්ණ යටිතල පහසුකම් සහ නිදහස් අධ්‍යාපන සංස්කෘතියක් ඇති කිරීමේ අරමුණින් රජය මෙම ආයෝජන සිදුකරන බවත් ඇය වැඩිදුරටත් අවධාරණය කළාය.
