ශ්රී ලංකා මහ බැංකුව විසින් නිකුත් කළ 2025 වාර්ෂික ආර්ථික විවරණයට අනුව, මෙරට ඉතිහාසයේ රථවාහන ගෙන්වීම සඳහා තුන්වැනි ඉහළම වියදම දැරූ වසර ලෙස 2025 වසර වාර්තා වී තිබේ. ඒ අනුව පසුගිය වසරේදී වාහන ආනයනය වෙනුවෙන් ඇමරිකානු ඩොලර් බිලියන 2.04 ක අතිවිශාල මුදලක් වැය කර ඇති බව මහ බැංකු වාර්තා පෙන්වා දෙයි. වසර ගණනාවක් පුරා පනවා තිබූ ආනයන සීමාවන් 2025 වසරේ ජනවාරි මාසය වන විට සම්පූර්ණයෙන්ම ඉවත් කිරීම මෙලෙස වාහන ගෙන්වීම ඉහළ යාමට ප්රධානතම හේතුව වී තිබේ.
දිගුකාලීන සීමා කිරීම්වලින් පසුව වෙළඳපොළ තුළ ඇති වූ දැඩි ඉල්ලුම පාලනය කිරීමට රජය විසින් විවිධ තීරුබදු ප්රතිපත්ති හඳුන්වා දුන්නද, විශේෂයෙන්ම 2025 අප්රේල් මාසයෙන් පසු පෞද්ගලික සහ වාණිජ වාහන ආනයනය කැපී පෙනෙන ලෙස වර්ධනය වී ඇත. ආර්ථික ක්රියාකාරකම් යථා තත්ත්වයට පත්වීම සහ ජනතාව තුළ පැවති ඉහළ ඉල්ලුම මෙම දැවැන්ත විදේශ විනිමය පිරිවැයට හේතු වී ඇති බව මහ බැංකු විග්රහයන්හි වැඩිදුරටත් සඳහන් වේ.
