වත්මන් ආර්ථිකය ස්ථාවර කරගැනීම සඳහා විදේශයන්හි සේවය කරන ශ්රී ලාංකිකයන් විසින් ලබාදෙන දායකත්වය අතිමහත් බවත්, ඒ අනුව 2025 වසරේදී පමණක් ඩොලර් බිලියන 8කට ආසන්න මුදලක් මෙරටට එවා ඇති බවත් කම්කරු නියෝජ්ය ඇමැති මහින්ද ජයසිංහ මහතා පවසයි. විදේශ ශ්රමිකයන් විසින් රටට යොමු කළ මෙතෙක් වැඩිම මුදල් ප්රමාණය මෙය බවද ඒ මහතා සඳහන් කළේය.
ශ්රී ලංකා විදේශ සේවා නියුක්ති කාර්යාංශය මගින් සංවිධානය කළ විදෙස්ගත මවුපියන්ගේ දරුවන් වෙත ශිෂ්යත්ව ප්රදානය කිරීමේ උත්සවයකදී නියෝජ්ය ඇමැතිවරයා මේ බව ප්රකාශ කළේය. එසේම, යුද ගැටුම් පැවති වටපිටාවක් තුළ වුවද, 2026 වසරේ මේ දක්වා මාස පහක කාලය තුළ පමණක් ඩොලර් බිලියන 4කට ආසන්න මුදලක් මෙරටට ලැබී තිබේ.
ගම්පහ දිස්ත්රික්කයේ ප්රාදේශීය ලේකම් කොට්ඨාස 13ක විදෙස්ගත ශ්රමිකයන්ගේ දරුවන් 143 දෙනෙකුගේ අධ්යාපන කටයුතු සඳහා මූල්යමය සහ ද්රව්යමය ආධාර ප්රදානය කිරීම මෙහිදී සිදු කෙරිණි. විදේශගතව ඉතා දුෂ්කර ජීවිත ගත කරමින් රටට විදේශ විනිමය ගෙන එන මවුපියන්ගේ කැපවීම සිහිපත් කළ නියෝජ්ය ඇමැතිවරයා, දරුවන්ගෙන් ඉල්ලා සිටියේ තම අධ්යාපන කටයුතු සාර්ථක කරගෙන අනාගතයේදී රටට සේවය කරන යහපත් පුරවැසියන් වීමට අධිෂ්ඨාන කර ගන්නා ලෙසයි.
විදේශ රැකියා අධීක්ෂණ පාර්ලිමේන්තු මන්ත්රී චම්පික හෙට්ටිආරච්චි මහතා මෙහිදී අදහස් දක්වමින් පැවසුවේ, දැනට පිරිනමන ශිෂ්යත්ව මුදල ඉදිරියේදී වැඩි කිරීමට කටයුතු කරන බවයි.
