ආනයනය කරන ලද ප්රමිතියෙන් තොර ගල් අඟුරු සඳහා ‘බාල ගල් අඟුරු’ යන යෙදුම භාවිත කිරීම නිවැරදි නොවන බවත්, පවතින එකම ගැටලුව එම ගල් අඟුරුවල බලශක්ති නිෂ්පාදනය කිරීමේ ධාරිතාව (Gross Calorific Value) නියමිත මට්ටමට වඩා අඩුවීම පමණක් බවත් බලශක්ති නියෝජ්ය අමාත්ය අර්කම් ඉල්යාස් මහතා ප්රකාශ කළේය. රජයේ ප්රවෘත්ති දෙපාර්තමේන්තුවේ පැවති මාධ්ය හමුවකදී මාධ්යවේදීන් නැඟූ ප්රශ්නවලට පිළිතුරු දෙමින් අමාත්යවරයා මේ බව සඳහන් කළේය.
මෙහිදී වැඩිදුරටත් අදහස් දැක්වූ නියෝජ්ය අමාත්යවරයා කියා සිටියේ, අදාළ ගල් අඟුරු තොගය ඉවත දමා නොමැති බවත් ඒවා බලාගාරයේ භාවිතයට ගන්නා බවත්ය. නියමිත ප්රමිතීන්ට අනුකූල නොවීම හේතුවෙන් මේ වන විට පළමු නැව්ගත කිරීම් 15 වෙනුවෙන් අදාළ සමාගමෙන් ඇමරිකානු ඩොලර් මිලියන 27ක දඩ මුදලක් අයකරගෙන (Withheld) ඇති බව ද ඔහු අනාවරණය කළේය. එමෙන්ම මෙම ගල් අඟුරු භාවිතය හේතුවෙන් නොරොච්චෝල බලාගාරයේ යන්ත්ර සූත්ර සඳහා කිසිදු තාක්ෂණික බලපෑමක් හෝ හානියක් සිදු නොවන බව ද ඔහු අවධාරණය කළේය.
