ජර්මනියේ හැම්බර්ග්හිදී පැවති ‘PAX International Readership Awards 2026’ සම්මාන උළෙලේදී සම්මාන දෙකක් දිනා ගැනීමට ශ්රීලංකන් ගුවන් සේවය සමත්ව තිබේ. ගෝලීය පාඨක මනාපය මත තෝරාගනු ලැබූ මෙම සම්මාන උළෙලේදී ‘Best Overall Passenger Experience – South Asia’ සහ ‘Most Improved Airline’ යන ගෞරවණීය සම්මාන ද්විත්වය ශ්රීලංකන් ගුවන් සේවය වෙත හිමි විය.
ගුවන් ගමන් තුළදී ලබාදෙන ආහාරපාන, විනෝදාස්වාද පහසුකම් සහ ආසන සැකැස්ම යන අංශයන්හි පවතින විශිෂ්ටත්වය මෙහිදී ඇගයීමට ලක්ව ඇත. මෙම ජයග්රහණය පිළිබඳව අදහස් දක්වමින් ශ්රීලංකන් ගුවන් සේවයේ නිපැයුම් සහ සේවා කළමනාකාරිනී මරියා සතාසිවම් මහත්මිය සඳහන් කළේ, මගීන් අපේක්ෂා කරන මට්ටමට වඩා ඉහළ සේවාවක් ලබාදීමට ගත් උත්සාහය මෙලෙස ඇගයීමට ලක්වීම මහත් ගෞරවයක් බවයි.
පාරිභෝගික සේවාවන් තවදුරටත් කාර්යක්ෂම කිරීම සඳහා ශ්රීලංකන් ගුවන් සේවය මේ වන විට AI තාක්ෂණය, Self-check-in සහ Bag Drop වැනි නවීන පහසුකම් ද හඳුන්වා දී ඇත. දැනට රටවල් 61ක ගමනාන්ත 120ක් දක්වා සිය මෙහෙයුම් සිදුකරන ශ්රීලංකන් ගුවන් සේවය, දේශීය සූපශාස්ත්ර උරුමය සහ උසස් මට්ටමේ ගුවන් විනෝදාස්වාද පහසුකම් හරහා මගීන්ට සුවිශේෂී ගමන් අත්දැකීමක් ලබාදීමට අඛණ්ඩව කටයුතු කරයි
