කොරෝනා වසංගතය පැවැති සමයේ ජනතා විමුක්ති පෙරමුණ (JVP) කිසිදු වගකීමකින් තොරව කටයුතු කළ බවත්, එවැනි පසුබිමක සිට මැදපෙරදිග අර්බුදය හමුවේ වර්තමාන විපක්ෂයෙන් සහාය ඉල්ලා සිටීම “විහිළුවක්” බවත් නව ජනතා පෙරමුණේ නායක සුගීෂ්වර බණ්ඩාර මහතා පවසයි. ඔහු මේ බව ප්‍රකාශ කළේ අද (18) උදෑසන ගාල්ල බස් නැවතුම්පොළ ඉදිරිපිට පැවැති මහජන පෙත්සමක් අත්සන් කිරීමේ අවස්ථාවට එක්වෙමිනි.
හිටපු බුද්ධි අංශ ප්‍රධානී සුරේෂ් සලේට සාධාරණය ඉටු කරන ලෙස ඉල්ලා අත්සන් ලක්ෂයේ ජනතා පෙත්සමේ තෙවන අදියරට එක්වෙමින් ඔහු මෙම අදහස් පළ කළේය.
එදා කොරෝනා වසංගතය හමුවේ එවක පැවැති රජය දැඩි වෙහෙසක් ගන්නා විට ජනතා විමුක්ති පෙරමුණ වෘත්තීය සමිති ක්‍රියාමාර්ග ගනිමින් රටේ ආර්ථිකය අඩාල කිරීමටත්, විදෙස්ගත ශ්‍රමිකයින්ට ඩොලර් එවීම නතර කරන ලෙසටත් බලපෑම් කළ බව ඔහු චෝදනා කළේය.
වර්තමාන මාලිමා රජය බලයට පත්වූයේ මෙන්ම දැනට පාලනය ගෙන යන්නේ ද “බොරුවෙන්” බවත්, මැදපෙරදිග අර්බුදය සම්බන්ධයෙන් ජනාධිපතිවරයා ඇතුළු රජය ජනතාවට සත්‍ය වසන් කරමින් සිටින බවත් ඔහු වැඩිදුරටත් පැවසීය.
එදා විපක්ෂයේ සිටියදී ආර්ථිකය අඩාල කර අරගලයක් හරහා බලයට ඒමට උත්සාහ කළ පිරිසක් අද බලයේ සිටිමින් “ලෝක තත්ත්වය සහ ප්‍රායෝගිකත්වය” ගැන කතා කිරීම හාස්‍යයට කරුණක් බව සුගීෂ්වර බණ්ඩාර මහතා අවධාරණය කළේය.
මැදපෙරදිග යුදමය තත්ත්වය හේතුවෙන් මෙරට ආර්ථිකයට සහ සුබසාධන කටයුතුවලට එල්ල වී ඇති බලපෑම් හමුවේ රජය සහ විපක්ෂය අතර පවතින මෙම දේශපාලන වාග් සංග්‍රාමය ඉදිරි දිනවලදී තවදුරටත් උණුසුම් වනු ඇතැයි දේශපාලන විචාරකයෝ පවසති.
