ප්රමිතියෙන් තොර සහ ජාතික තත්ත්ව පිරිවිතරයන්ට අනුකූල නොවන ලුණු වෙළඳපොළට නිකුත් කිරීම සහ අලෙවි කිරීම සම්බන්ධයෙන් කොළඹ ප්රධාන මහේස්ත්රාත් අධිකරණය විසින් සුපිරි වෙළඳසැල් ජාලයකට සහ ලුණු නිෂ්පාදන සමාගමකට රුපියල් 200,000ක දඩයක් නියම කර තිබේ.
පාරිභෝගික කටයුතු පිළිබඳ අධිකාරිය (CAA) විසින් සිදුකළ වැටලීම් සහ පරීක්ෂණවලින් අනතුරුව, එම ආයතන දෙකම රුපියල් 100,000 බැගින් දඩ මුදල් ගෙවීමට නියෝග කරනු ලැබුවේ පසුගිය ජූනි 17 වන දිනයි.
මෙම ආයතන විසින් අලෙවි කර ඇති කුඩු කළ මේස ලුණු නිෂ්පාදනය, ශ්රී ලංකා ප්රමිති ආයතනයේ (SLSI 80:2019) නියමිත ප්රමිතීන්ට අනුකූල නොවන බව විමර්ශනවලදී තහවුරු විය. කොළඹ පිහිටි සුපිරි වෙළඳසැල් අලෙවි සැලකින් ලබාගත් සාම්පල රජයේ රස පරීක්ෂකවරයා වෙත යොමු කිරීමෙන් පසු මෙම නිෂ්පාදන පාරිභෝගිකයන් නොමඟ යවන සුළු මට්ටමක පවතින බව හෙළි විය.
පාරිභෝගික කටයුතු පිළිබඳ අධිකාරි පනතේ 30 සහ 31 වගන්ති යටතේ නඩු පවරා තිබූ මෙම ආයතන දෙකම අධිකරණය හමුවේ වරද පිළිගැනීමෙන් අනතුරුව මෙම දඬුවම් නියම කෙරිණි.
ප්රමිතියෙන් තොර භාණ්ඩ අලෙවි කරන වෙළෙන්දන් සහ නිෂ්පාදකයින් පිළිබඳව මහජනතාවට වහාම දැනුම් දිය හැකි අතර, ඒ සඳහා පාරිභෝගික කටයුතු පිළිබඳ අධිකාරියේ 1977 ක්ෂණික ඇමතුම් අංකය වෙත කාර්යාල වේලාව තුළ සම්බන්ධ වන ලෙස බලධාරීන් ඉල්ලා සිටී.
