බංග්ලාදේශ ජාතික ක්රිකට් කණ්ඩායමේ හිටපු නායක, 37 හැවිරිදි තමීම් ඉක්බාල් බංග්ලාදේශ ක්රිකට් ආයතනයේ (BCB) නව සභාපතිවරයා ලෙස තේරී පත්ව තිබේ. ඩකා නුවරදී ඉරිදා (ජුනි 07) පැවති ක්රිකට් ආයතන මැතිවරණයෙන් අනතුරුව ඔහු වසර හතරක ධුර කාලයක් සඳහා මෙම තනතුරට පත්වූ බව වාර්තා වේ.
මීට පෙර අප්රේල් මාසයේ සිට BCB හි අන්තර්කාලීන කමිටුවේ ප්රධානියා ලෙස කටයුතු කළ තමීම් ඉක්බාල්, නව අධ්යක්ෂ මණ්ඩලයට තේරී පත්වීමෙන් පසු කිසිදු විරුද්ධවාදියෙකු නොමැතිව සභාපතිවරයා ලෙස ඒකමතිකව තෝරාගනු ලැබීය. මෙම මැතිවරණයෙන් බංග්ලාදේශ ක්රිකට් පාලනය සඳහා ඉදිරි වසර හතර සඳහා සාමාජිකයින් 25 දෙනෙකුගෙන් යුත් අධ්යක්ෂ මණ්ඩලයක් පත් කර ඇති අතර, එහි උප සභාපතිවරයා ලෙස ෆහිම් සින්හා තේරී පත්විය.
තම පත්වීමෙන් පසු අදහස් දැක්වූ තමීම් ඉක්බාල් ප්රකාශ කළේ, බංග්ලාදේශ ක්රිකට් ක්ෂේත්රය කෙරෙහි පවතින විශ්වාසය යළි ගොඩනැගීමටත්, ක්රිකට් පාලක මණ්ඩලය තුළ විනිවිදභාවය ඉහළ නැංවීමටත් තමන් කැපවී කටයුතු කරන බවයි. මෑත කාලීන මතභේදාත්මක තත්ත්වයන්ගෙන් මිදී, ක්රීඩාවේ අනාගත සංවර්ධනය කෙරෙහි පමණක් අවධානය යොමු කිරීමට තමන් බලාපොරොත්තු වන බව ඔහු වැඩිදුරටත් සඳහන් කළේය.
බංග්ලාදේශ එක්දින ජාත්යන්තර ක්රිකට් ඉතිහාසයේ වැඩිම ලකුණු ලාභියා ලෙස වාර්තා තබා ජාත්යන්තර ක්රිකට් පිටියෙන් සමුගත් තමීම් ඉක්බාල්, එරට ක්රිකට් ක්ෂේත්රයේ සිටින අතිශය ජනප්රියතම ක්රීඩකයෙකි.
