අඛණ්ඩව වසර හතරක් පුරා ඇවිලී යන රුසියානු – යුක්රේන යුද්ධයට තාවකාලික විරාමයක් එක් කරමින් අමෙරිකානු ජනාධිපති ඩොනල්ඩ් ට්රම්ප්ගේ මැදිහත්වීමෙන් ප්රකාශයට පත් කළ තෙදින සටන් විරාමය අද (09) සිට සාර්ථකව ක්රියාත්මක වේ. මේ වන විට යුක්රේනයේ කිසිදු ප්රදේශයකින් මිසයිල හෝ ඩ්රෝන ප්රහාර වාර්තා වී නොමැති අතර, වසර ගණනාවකට පසු ලැබුණු මෙම කෙටි නිහඬතාවය යුක්රේන වැසියන් මහත් අස්වැසිල්ලකින් යුතුව පිළිගෙන තිබේ. යුද්ධය ආරම්භ වූ 2022 වසරේ සිට අඛණ්ඩව ප්රහාරයන්ට ලක්වූ වැසියන්ට අවම වශයෙන් රාත්රී කිහිපයක් හෝ සාමකාමීව නින්දට යාමට මෙමගින් අවස්ථාව උදාවී ඇත.
මෙම සටන් විරාමයට සමගාමීව දෙපාර්ශවය අතර සිරකරුවන් දහසක් බැගින් හුවමාරු කර ගැනීමට ද එකඟතාවය පළ වී ඇති අතර මානුෂීය සහන ලබා දීමට ද අවස්ථාව සැලසී තිබේ. ජනාධිපති ට්රම්ප් ප්රකාශ කර ඇත්තේ මැයි 9 සිට 11 දක්වා ක්රියාත්මක මෙම සටන් විරාමය තවදුරටත් දීර්ඝ කිරීමට තමන් බලාපොරොත්තු වන බවයි. කෙසේ වෙතත් ක්රෙම්ලිනය අවධාරණය කරන්නේ පවතින ගැටුම ඉතා සංකීර්ණ බැවින් ස්ථිර සාම ගිවිසුමක් සඳහා තවත් බොහෝ කාලයක් සහ දීර්ඝ සාකච්ඡා අවශ්ය වනු ඇති බවයි.
රුසියාවේ විජයග්රාහී දින පෙළපාලිය මධ්යයේ වුවද දෙරට අතර සටන් විරාමය කඩ නොවීම ලෝක ප්රජාවගේ පැසසුමට ලක්වී ඇති අතර යුක්රේන වැසියන්ගේ ප්රාර්ථනය වී ඇත්තේ මෙම තාවකාලික නිහඬතාවය ස්ථිර සාමයක් දක්වා වර්ධනය වනු දැකීමයි. විශේෂයෙන්ම හාර්කිව් වැනි යුද පීඩාවට ලක්වූ ප්රදේශවල වැසියන් පවසන්නේ වසර පහක විනාශය දැන් අවසන් විය යුතු බවත්, යුධ පිටියේ තීරණ වෙනුවට කාර්යාල මේස මත සාකච්ඡා මාර්ගයෙන් විසඳුම් සොයාගත යුතු බවත්ය. ඉදිරි දින කිහිපය තුළ මෙම සටන් විරාමයේ ස්ථාවරත්වය මත යුද්ධයේ ඉදිරි ගමන තීරණය වනු ඇත.
