ඇමෙරිකානු ජනාධිපති ඩොනල්ඩ් ට්රම්ප් විසින් ‘Truth Social’ සමාජ මාධ්ය ජාලය ඔස්සේ “තවදුරටත් හොඳ මිනිහෙකු වීමට සූදානම් නැත” (No more Mr. Nice Guy!) යනුවෙන් සිදුකළ ප්රකාශයත් සමඟ ඇමෙරිකාව සහ ඉරානය අතර පවතින අර්බුදය යළිත් ලෝක අවධානයට ලක්ව තිබේ. යම් ආකාරයක ගිවිසුමකට එළඹීමට ඉරානය අපොහොසත් වී ඇති බවට චෝදනා කරන ට්රම්ප්, ඒ සඳහා ටෙහෙරානයට ඇති කාලය වේගයෙන් අවසන් වෙමින් පවතින බවට ද අනතුරු ඇඟවීමක් කර ඇත.
වොෂින්ටනය විසින් ඉරානය වෙත “සාධාරණ සහ යුක්තිසහගත ගිවිසුමක්” යෝජනා කර ඇති බවත්, එය ප්රතික්ෂේප කළහොත් දැඩි ප්රතිවිපාකවලට මුහුණ දීමට සිදුවනු ඇති බවත් ජනාධිපති ට්රම්ප් මීට පෙර ද ප්රකාශ කර තිබුණි. ඉරානයේ න්යෂ්ටික වැඩසටහන, සම්බාධක ලිහිල් කිරීම සහ කලාපීය ආරක්ෂාව පිළිබඳ ගැටලු මුල්කරගනිමින් දෙරට අතර පවතින සාකච්ඡා තවදුරටත් අසීරු තත්ත්වයක පවතින බව රොයිටර්ස් පුවත් සේවය වාර්තා කරයි. ඉරානය විසින් සාකච්ඡා සඳහා මාර්ග සොයමින් සිටින බවට ඇමෙරිකාව ප්රකාශ කළ ද, ටෙහෙරාන බලධාරීන් එම මතය සම්බන්ධයෙන් සිය විරෝධය පළකර තිබේ. ලෝකයේ බොරතෙල් ප්රවාහනයෙන් සැලකිය යුතු ප්රමාණයක් සිදුවන හෝමුස් සමුද්ර සන්ධිය වැනි උපායමාර්ගික ස්ථාන හේතුවෙන්, මෙම අර්බුදය හමුවේ බලශක්ති වෙළඳපොළ සහ රාජ්ය තාන්ත්රිකයින් දැඩි විමසිල්ලෙන් පසුවේ.
