ඉරානය කිසිසේත්ම න්යෂ්ටික අවියක් අත්පත් කර නොගත යුතු බවටත්, ලෝක බලශක්ති සැපයුමට අතිශය වැදගත් වන ‘හෝමූස් සමුද්ර සන්ධිය’ බාධාවකින් තොරව විවෘතව තැබිය යුතු බවටත් අමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පින් අතර එකඟතාවයක් ඇති වී තිබේ. බීජිං අගනුවර පැවැත්වෙන ඉහළ පෙළේ රාජ්ය තාන්ත්රික හමුවේදී මෙම තීරණවලට එළඹුණු බව ධවල මන්දිරය නිවේදනය කළේය.
ඉරානයට කිසිදා න්යෂ්ටික අවියක් හිමි නොවිය යුතු බවට නායකයන් දෙපළම එකඟ වී ඇති අතර, නිදහස් නාවික ගමනාගමනය සුරැකීමේ අවශ්යතාවය ද අවධාරණය කර තිබේ. ලෝකයේ තෙල් සහ ස්වභාවික වායු ප්රවාහයෙන් පහෙන් එකක් පමණ හෝමූස් සමුද්ර සන්ධිය හරහා සිදුවන බැවින්, එම කලාපය මිලිටරීකරණය කිරීමට හෝ නෞකා සඳහා බදු අය කිරීමට දරන ඕනෑම උත්සාහයකට චීනය විරුද්ධ වන බව ෂී ජින්පින් පෙන්වා දුන්නේය. බලශක්ති සැපයුම සඳහා හෝමූස් සමුද්ර සන්ධිය මත පවතින යැපීම අවම කර ගැනීමට චීනය අමෙරිකානු තෙල් මිලදී ගැනීම වැඩි කිරීමට ද කැමැත්ත පළ කර ඇත.
චීනය තුළ අමෙරිකානු ව්යාපාර සඳහා වැඩි අවස්ථාවන් ලබාදීම සහ අමෙරිකානු කර්මාන්ත ක්ෂේත්රයේ චීන ආයෝජන දිරිමත් කිරීම පිළිබඳව මෙහිදී අවධානය යොමු විය. අමෙරිකානු කෘෂිකාර්මික නිෂ්පාදන මිලදී ගැනීම ඉහළ නැංවීමටත්, ‘ෆෙන්ටැනයිල්’ නිෂ්පාදනයට යොදාගන්නා රසායනික ද්රව්ය පාලනය කිරීමටත් නායකයෝ එකඟ වූහ. ජනාධිපති ට්රම්ප් මෙම සාකච්ඡා “ඉතාමත් සාර්ථක හා ඵලදායී” වූ බව ප්රකාශ කළ අතර, ලබන සැප්තැම්බර් මාසයේදී නිල සංචාරයක් සඳහා ධවල මන්දිරය වෙත පැමිණෙන ලෙස ෂී ජින්පින් ට ආරාධනා කර තිබේ.
