ඇමරිකාව සහ ඉරානය අතර පවතින දැවැන්ත යුදමය තත්ත්වය සමනය කර ගැනීම සඳහා සහාය ඉල්ලා ඇමරිකානු ජනාධිපති ඩොනල්ඩ් ට්රම්ප් චීන ජනාධිපති ෂී ජින්පින් හමුවීමට නියමිතය. ලෝක තෙල් මිල ඉහළ යෑමටත්, ඇමරිකානු ආර්ථිකයට දැඩි බලපෑමක් එල්ල කිරීමටත් හේතු වී ඇති මෙම යුද්ධය අවසන් කිරීමට චීනයේ මැදිහත්වීම තීරණාත්මක වනු ඇතැයි වොෂින්ටනය විශ්වාස කරයි.
ඉරාන තෙල් ලබාගන්නා ලොව විශාලතම ගැණුම්කරු වන්නේ චීනයයි. චීනය ඉරානය සමඟ සාකච්ඡා කිරීමට එකඟ වුවද, තම ප්රධානතම මැදපෙරදිග මිතුරා වන ඉරානය වෙත ලබාදෙන ආර්ථික සහයෝගය හෝ යුධමය අවශ්යතා සඳහා භාවිත කළ හැකි භාණ්ඩ (dual-use goods) සැපයීම නතර කිරීමට චීන නායකයා මැලි වනු ඇතැයි විශ්ලේෂකයෝ පවසති.
චීනයට බලපෑම් කිරීම සඳහා චීන බැංකුවලට සම්බාධක පැනවීම වැනි ප්රබල ආයුධ ට්රම්ප් සතුව පැවතියද, එවැනි පියවරක් ගැනීම හරහා ඇමරිකාවට ද දැඩි ආර්ථික පාඩුවක් විඳීමට සිදුවනු ඇත. චීන බැංකුවලට එරෙහිව සම්බාධක පැනවීම, දෙරට අතර නැවතත් වෙළඳ යුද්ධයක් (Trade War) ඇති වීමටත්, ඇමරිකානු කර්මාන්ත සඳහා අත්යවශ්ය දුර්ලභ ඛනිජ (Critical Minerals) සැපයුම චීනය විසින් අත්හිටුවීමටත් හේතු විය හැකිය.
ඇමරිකානු නාවික හමුදාව විසින් ඉරානය වටලා තිබීම සහ හෝමුස් සමුද්ර සන්ධිය හරහා ගමනාගමනයට බාධා පැමිණීම පිළිබඳව චීනය සිය විරෝධය පළ කර තිබේ. චීනය පවසන්නේ ඒකපාර්ශ්වික සම්බාධක පැනවීම වෙනුවට සටන් විරාමයක් සඳහා කටයුතු කිරීම ප්රමුඛතාව විය යුතු බවයි.
ජනාධිපති ට්රම්ප්ගේ ජනප්රියතාවට මෙම යුද්ධය දැඩි බලපෑමක් එල්ල කර ඇති පසුබිමක, මෙම සතියේ පැවැත්වෙන ට්රම්ප් – ෂී හමුව ලෝක දේශපාලනයේ සහ ආර්ථිකයේ ඉදිරි ගමන්මඟ තීරණය කරන තීරණාත්මක සාධකයක් වනු ඇත.
