පවත්නා කාලසටහනට අනුව පැවැත්වීමට නියමිත උසස් පෙළ විභාගය කල් දමන ලෙස ඉල්ලමින් මේ සතිය තුළ අධිකරණය හමුවේ නඩුවක් ගොනු කිරීමට පියවර ගන්නා බව පිවිතුරු හෙළ උරුමයේ නායක, නීතිඥ උදය ගම්මන්පිල මහතා ප්රකාශ කරනවා. පක්ෂ කාර්යාලයේ ඊයේ (22) පැවැති මාධ්ය හමුවකට එක්වෙමින් ඔහු කියා සිටියේ, සාමාන්යයෙන් උසස් පෙළ විභාගයකට සූදානම් වීම සඳහා සිසුන්ට මාස 24ක කාලයක් හිමි වුවද, මෙවර පළමුවරට විභාගයට පෙනී සිටින දරුවන්ට මාස 21කටත් අඩු කාලයක් ලැබීම දැඩි අසාධාරණයක් බවයි. මේ හේතුවෙන් විභාගය කල් දමන ලෙස පිවිතුරු හෙළ උරුමය ඇතුළු විවිධ කණ්ඩායම් රජයෙන් දිගින් දිගටම ඉල්ලීම් කළ බව ද ඔහු සිහිපත් කළේය.
පළමු වර පෙනී සිටින සිසුන්ට පමණක් නොව, දෙවන හෝ තුන්වන වතාවට උසස් පෙළ විභාගයට පෙනී සිටීමට සූදානම් වන සිසුන්ට ද මෙවර බරපතළ අසාධාරණයක් සිදුව ඇති බව ගම්මන්පිල මහතා මෙහිදී සංඛ්යාලේඛන සහිතව පෙන්වා දුන්නේය. සාමාන්යයෙන් එම සිසුන් සඳහා දින 178ත් 198ත් අතර කාලයක් අධ්යයන කටයුතු වෙනුවෙන් ලැබුණ ද, මෙවර ඔවුන්ට ලැබී ඇත්තේ දින 133ක් වැනි කෙටි කාලයක් පමණක් බවයි ඔහු අවධාරණය කරන්නේ.
මෙවැනි පසුබිමක “කවුරු මොනවා කිව්වත් අපි එක දවසකින්වත් උසස් පෙළ විභාගය කල් දමන්නේ නැහැ” යනුවෙන් ආණ්ඩුව විසින් නිවේදනයක් නිකුත් කර තිබීම, විභාගයට මුහුණ දෙන දරුවන්ගේ බලාපොරොත්තු සුන් කරවන සහ ඔවුන්ගේ මානසිකත්වය පිළිබඳව කිසිදු තැකීමක් නොකරන අසංවේදී ප්රකාශයක් බව ද උදය ගම්මන්පිල මහතා වැඩිදුරටත් කියා සිටියේය.
