දකුණු ඉන්දීය දේශපාලනය උණුසුම් කරමින්, DMK පක්ෂයේ ප්රමුඛ නායකයෙකු වන උදයනිධි ස්ටාලින් අද (04) පෙරවරුවේ චෙන්නායිහි පිහිටි ඔහුගේ නිවසේදී තමිල්නාඩු පොලිසිය විසින් අත්අඩංගුවට ගෙන තිබෙනවා. ඉන්දීය මාධ්ය වාර්තා කරන පරිදි මෙම අත්අඩංගුවට ගැනීම සිදුව ඇත්තේ, පසුගියදා තංජාවූර්හි පැවති ජනහමුවකදී ජනප්රිය දකුණු ඉන්දීය නිළි ත්රිෂා සම්බන්ධයෙන් ඔහු සිදු කළ බව කියන ද්විඅර්ථක සහ අශෝභන ප්රකාශයක් සම්බන්ධයෙන් එල්ල වූ චෝදනා මතයි.පොලිස් නිලධාරීන් සමග රැගෙන යන අවස්ථාවේදී මාධ්ය වෙත අදහස් දැක්වූ උදයනිධි ස්ටාලින් ප්රකාශ කර ඇත්තේ, මෙම අත්අඩංගුවට ගැනීම තමන් “විහිළුවක්” ලෙස සලකන බවත්, ඊට එරෙහිව නීතිමය ක්රියාමාර්ග ගන්නා බවත්ය. කෙසේ වෙතත්, DMK පක්ෂය මෙම අත්අඩංගුවට ගැනීම දැඩි ලෙස විවේචනය කරමින් එය දේශපාලන පළිගැනීමක් බවට චෝදනා කර ඇති අතර, උදයනිධි ස්ටාලින් කිසිවෙකුට අපහාස වන අයුරින් ප්රකාශයක් සිදු නොකළ බවත්, ඔහු ත්රිෂාගේ නම පවා සඳහන් නොකළ බවත් පක්ෂයේ නායක ටී.කේ.එස්. එලංගෝවන් සඳහන් කර ඇත.මේ අතර, චෝදනාව ගොනු කළ TVK පක්ෂය පවසන්නේ, උදයනිධි ස්ටාලින් අත්අඩංගුවට ගෙන ඇත්තේ ප්රධාන අමාත්ය ජෝසෆ් විජේ හෝ TVK පක්ෂය විවේචනය කළ නිසා නොව, කාන්තාවකට අපහාස වන අයුරින් ප්රකාශ කිරීම හේතුවෙන් බවයි. මේ සම්බන්ධයෙන් ඉන්දීය ජාතික කාන්තා කොමිසම (NCW) වෙත පැමිණිල්ලක්ද ඉදිරිපත් කර ඇති අතර, තමිල්නාඩු BJP පක්ෂයද ඔහු වහාම අත්අඩංගුවට ගත යුතු බවට ඊයේ (03) ඉල්ලීමක් කර තිබිණි. නිළි ත්රිෂා සහ ප්රධාන අමාත්ය ජෝසෆ් විජේ සම්බන්ධයෙන් පළ වූ කටකතා පදනම් කර ගනිමින් මීට පෙරද දේශපාලන හා සිනමා ක්ෂේත්රයේ පුද්ගලයන් විසින් විවිධ ප්රකාශ සිදු කර තිබුණු බව ඉන්දීය මාධ්ය වැඩිදුරටත් සඳහන් කරයි.
