එක්සත් රාජධානිය දුම්කොළ භාවිතයෙන් තොර අනාගත පරපුරක් බිහි කිරීම වෙනුවෙන් ඓතිහාසික නීතිමය පියවරක් ගෙන තිබේ. ඒ අනුව 2009 ජනවාරි 1 වනදා හෝ ඊට පසුව උපන් කිසිදු පුද්ගලයෙකුට බ්රිතාන්යය තුළ දුම්කොළ නිෂ්පාදන මිලදී ගැනීම සදහටම තහනම් වනු ඇත. මෙම “දුම්කොළ සහ වේප්ස් පනත් කෙටුම්පත” බ්රිතාන්ය පාර්ලිමේන්තුවේ මන්ත්රී මණ්ඩල දෙකෙහිම අනුමැතිය ලබා අවසන් අදියරට පැමිණ ඇති අතර, තෙවන චාල්ස් රජුගේ රාජකීය අනුමැතිය ලැබීමෙන් පසු එය නිල වශයෙන් නීතියක් බවට පත්වේ.
දැනට දුම්කොළ මිලදී ගැනීම සඳහා පවතින අවුරුදු 18ක අවම වයස් සීමාව, 2027 ජනවාරි 1 වනදා සිට සෑම වසරකම එක් වසරකින් ඉහළ දමනු ලැබේ. මෙහි ප්රතිඵලයක් ලෙස 2009න් පසු උපන් අයට කිසි දිනක නීත්යානුකූලව සිගරට් මිලදී ගැනීමට අවස්ථාව හිමි නොවේ. වයස තහවුරු කර නොගෙන නීති විරෝධී ලෙස දුම්කොළ අලෙවි කරන වෙළෙන්දන්ට පවුම් 200ක ක්ෂණික දඩ මුදල් ඇතුළු දැඩි මූල්ය දඬුවම් පැනවේ. රෝහල්, පාසල් සහ ළමා ක්රීඩා පිටි වැනි පොදු ස්ථානවලින් පිටත එළිමහන් පරිශ්රයන්හි දුම්පානය කිරීම ද මෙමගින් තහනම් කෙරේ. අවුරුදු 18ට අඩු දරුවන් සිටින මෝටර් රථ තුළ වේප් කිරීම නීති විරෝධී වන අතර, තරුණ පරපුර ආකර්ෂණය කරගන්නා ඇතැම් ඉවත දැමිය හැකි වේප් වර්ග (Disposable vapes) සහ ඒවායේ වෙළඳ දැන්වීම් ද තහනම් කෙරේ.
එංගලන්තය, ස්කොට්ලන්තය, වේල්සය සහ උතුරු අයර්ලන්තය යන එක්සත් රාජධානියේ සියලුම සංඝටක රටවල් සඳහා මෙම නීතිය පොදුවේ අදාළ වේ. නවසීලන්තය මීට පෙර මෙවැනිම නීතියක් හඳුන්වා දුන්නද, පසුව එරට රජය වෙනස් වීමත් සමඟ එම තීරණය හකුලා ගත් අතර, ඒ අනුව බ්රිතාන්යය මෙවැනි දැඩි නීතියක් ක්රියාත්මක කරන ලොව පළමු රට බවට පත්වීමට නියමිතය. මෙය බ්රිතාන්යයේ මහජන සෞඛ්ය ඉතිහාසයේ පරම්පරාවක සිදුකරන දැවැන්තම මැදිහත්වීම ලෙස සෞඛ්ය අංශ හඳුන්වා දෙයි.
