රුසියානු ග්රහණයට නතු වූ යුක්රේන ප්රදේශවලින් සොරකම් කරන ලද බවට සැකකෙරෙන ධාන්ය තොගයක් Haifa වරායට රැගෙන ඒම සම්බන්ධයෙන් යුක්රේනය ඊශ්රායල තානාපතිවරයාව කැඳවා සිය දැඩි විරෝධය පළ කර තිබේ.
දැනට Haifa වරාය ආසන්නයේ නැංගුරම් ලා ඇති පැනමා ධජය සහිත ‘Panormitis’ නෞකාව සන්තකයේ සොරකම් කරන ලද තිරිඟු සහ බාර්ලි ටොන් 25,000කට අධික ප්රමාණයක් පවතින බව යුක්රේන බුද්ධි අංශ පෙන්වා දෙයි. මෙම ධාන්ය තොගය ගොඩබෑමට ඊශ්රායල බලධාරීන් අවසර ලබා දුනහොත් දෙරට අතර සබඳතාවල දැඩි අර්බුදයක් නිර්මාණය වන බවට යුක්රේන විදේශ අමාත්ය ඇන්ඩ්රි සිබිහා (Andrii Sybiha) මහතා අනතුරු අඟවා ඇත.
ඊශ්රායල විදේශ අමාත්ය ගිඩියොන් සාර් (Gideon Sa’ar) මහතා ප්රකාශ කළේ හුදු චෝදනා සාක්ෂි නොවන බවත්, යුක්රේනය මේ සම්බන්ධයෙන් නිසි සාක්ෂි ඉදිරිපත් කර නොමැති බවත්ය. ඊශ්රායලය නීතියට ගරු කරන රටක් බැවින් ජාත්යන්තර නීතිවලට අනුකූලව මෙම කරුණ විමර්ශනය කරන බව ඔහු වැඩිදුරටත් සඳහන් කළේය.
පසුගිය අප්රේල් මුලදී ‘Abinsk’ නම් රුසියානු නෞකාව ද සොරකම් කරන ලද යුක්රේන තිරිඟු ටොන් 44,000ක් Haifa වරායේ ගොඩබෑම සම්බන්ධයෙන් යුක්රේනය සිය අප්රසාදය පළ කර තිබුණි. එවැනි නැව් තොග අවම වශයෙන් හතරක්වත් මේ වසරේදී ඊශ්රායලයට පැමිණ ඇති බව වාර්තා වේ. මෙම නීතිවිරෝධී වෙළඳාම වැළැක්වීමට ඊශ්රායලය නිසි පියවර නොගැනීම පිළිබඳව යුක්රේනය සිය මවිතය පළ කර සිටියි.
