ඩ්රෝන තාක්ෂණය සහ පාබල හමුදා ක්රියාකාරකම් ඒකාබද්ධ කළ නව යුද මෙහෙයුම් ආකෘතියක් (New Combat Model) හඳුන්වා දී ඇති බවත්, එමඟින් රුසියානු හමුදා යටතේ පැවති දකුණුදිග ප්රදේශ සාර්ථකව මුදාගැනීමට හැකි වූ බවත් යුක්රේන ආරක්ෂක අමාත්යාංශය බදාදා නිවේදනය කළේය.
යුක්රේන සන්නද්ධ හමුදාවල ප්රධාන අණදෙන නිලධාරී ඔලෙක්සැන්ඩර් සිර්ස්කි (Oleksandr Syrskyi) ප්රකාශ කළේ, පසුගිය මාර්තු මාසයේදී පමණක් රුසියානු ග්රහණයේ තිබූ වර්ග කිලෝමීටර් 50ක පමණ භූමි ප්රමාණයක් යළි අත්පත් කර ගැනීමට සිය හමුදා සමත් වූ බවයි. වසර හතරක් පුරා ඇදී යන මෙම යුද්ධයේදී ඩ්රෝන යානා ප්රමුඛ කාර්යභාරයක් ඉටු කරන අතර, නව ක්රමවේදය යටතේ ගුවනින් ක්රියාත්මක වන ඩ්රෝන සහ ගොඩබිම ක්රියාත්මක වන ස්වයංක්රීය පද්ධති (Unmanned systems) පාබල හමුදාව සමඟ ඒකාබද්ධව මෙහෙයවනු ලැබේ.
විශේෂයෙන්ම පෙබරවාරි මාසයේ සිට දකුණුදිග පෙරමුණේ ලබාගත් ජයග්රහණ සඳහා මෙම දියුණු යුද ඒකක සෘජුවම දායක වූ බව ආරක්ෂක අමාත්යාංශය පෙන්වා දෙයි. කෙසේ වෙතත්, වසන්ත කාලයේ පවතින යහපත් කාලගුණයත් සමඟ රුසියානු හමුදා ද කිලෝමීටර් 1,200ක් දිගැති සමස්ත යුද පෙරමුණ පුරාම සිය ප්රහාරාත්මක මෙහෙයුම් දැඩි කර ඇති බව අණදෙන නිලධාරී සිර්ස්කි වැඩිදුරටත් අනාවරණය කළේය.
