සමගි ජන බලවේගයේ මහලේකම් රංජිත් මද්දුම බණ්ඩාර මහතා වෙත ලිපියක් යොමු කරමින් එක්සත් ජාතික පක්ෂයේ මහලේකම් නීතීඥ තලතා අතුකෝරල මහත්මිය සඳහන් කර ඇත්තේ, මෙවර මැයි පළමුවැනිදා පසළොස්වක පොහෝ දිනයක් බැවින් එදින දේශපාලන කටයුතුවලින් බැහැරව ආගමික උත්සව සඳහා වෙන් කිරීමට තම පක්ෂය තීරණය කර ඇති බවයි. හිටපු ජනාධිපති රණසිංහ ප්රේමදාස මහතා අනුගමනය කළ ප්රතිපත්තියක් සිහිපත් කරමින් ඇය පෙන්වා දී ඇත්තේ මැයි දිනය පොහෝ දිනයක් වූ විට දේශපාලන රැලි පැවැත්වීම සුදුසු නොවන බවයි. මේ හේතුවෙන් සමගි ජන බලවේගය ඇතුළු අනෙකුත් පක්ෂවල මැයි දින රැලි සඳහා සහභාගී වීමට එක්සත් ජාතික පක්ෂයට අවකාශ නොමැති බව එම ලිපිය මඟින් දැනුම් දී තිබේ.
කෙසේ වුවද, එක්සත් ජාතික පක්ෂය සහ සමගි ජන බලවේගය එක්ව කටයුතු කිරීම බොහෝ දෙනෙකුගේ අපේක්ෂාව බව පිළිගන්නා මහලේකම්වරිය, එම ජනතා අභිලාෂයන් වෙනුවෙන් පක්ෂය කැපවී සිටින බව ද අවධාරණය කර ඇත. මැයි දින වැඩසටහන්වලට සහභාගී නොවූවද, අනාගත දේශපාලන කටයුතුවලදී සහයෝගයෙන් සහ ඒකාබද්ධව වැඩ කිරීමට එක්සත් ජාතික පක්ෂය සූදානම් බව ඇය සිය ලිපිය මඟින් වැඩිදුරටත් සහතික කර තිබේ. මෙම ප්රතිචාරය හරහා ඉදිරි දේශපාලන සන්ධානගතවීම් පිළිබඳව සුභවාදී ඉඟියක් පළ කර ඇති බව දේශපාලන විචාරකයෝ පවසති.
