වසර 35ක කාලයක් අමෙරිකානු ජනාධිපතිවරුන්ගේ නිල ගුවන් යානය ලෙස සේවය කළ සුප්රකට බෝයිං 747 යානය සිය අවසන් මෙහෙයුම් පියාසර කිරීම සිදුකරමින් නිල වශයෙන් විශ්රාම ගෙන තිබේ. ප්රංශයේ පැවැති G7 සමුළුවට සහභාගී වී ජනාධිපති ඩොනල්ඩ් ට්රම්ප් රැගෙන බ්රහස්පතින්දා අලුයම මේරිලන්ඩ් හි ජොයින්ට් බේස් ඇන්ඩෲස් ගුවන් තොටුපළ වෙත ළඟා වීම එහි අවසන් ගමන ලෙස සටහන් විය.
ජෝර්ජ් එච්.ඩබ්ලිව්. බුෂ් ජනාධිපතිවරයාගේ පාලන සමයේ සිට බලයට පත් වූ සියලුම අමෙරිකානු ජනාධිපතිවරුන්ට සේවය සැපයූ මෙම යානය වෙනුවෙන් ධවල මන්දිරයේ ජ්යෙෂ්ඨ නිලධාරීන් සමාජ මාධ්ය හරහා සිය ගෞරවය සහ උපහාරය පළ කර තිබුණි.
මෙම යානය විශ්රාම ගැන්වීමත් සමඟ අන්තර්කාලීන පියවරක් ලෙස කටාර් රාජ්යයෙන් තෑගි කරන ලද බෝයිං 747 යානයක් ජනාධිපති නිල යානා ඇණියට එක් කර ගැනීමට පියවර ගෙන ඇත. අමෙරිකානු ගුවන් හමුදාව විසින් මෙම යානයේ ප්රතිසංස්කරණ සහ පරීක්ෂණ පියාසර කටයුතු සාර්ථකව අවසන් කර ඇති අතර, එය නවීකරණය කිරීමට වැය වූ මුදල ඩොලර් මිලියන 400 ඉක්මවා නොමැත.මෙම නව යානය රතු, සුදු සහ නිල් යන වර්ණවලින් හැඩගැන්වූ නව සැලසුමකින් යුක්ත වීම විශේෂත්වයකි. ජනාධිපති ඩොනල්ඩ් ට්රම්ප් ලබන මාසයේ පැවැත්වෙන අමෙරිකාවේ 250 වැනි නිදහස් දින සැමරුමට සමගාමීව සවුත් ඩැකෝටා වෙත සිදුකරන සංචාරයේදී මෙම නව යානයේ සමාරම්භක පියාසර කිරීමට සහභාගී වීමට නියමිතය.
අමෙරිකානු ගුවන් හමුදාව විසින් ඩොලර් බිලියන 5.6ක පිරිවැයකින් ඇණවුම් කර ඇති නවතම ජනාධිපති බෝයිං 747 යානා දෙක සේවයට එක්වන තෙක් මෙම කටාර් යානය අන්තර්කාලීන පියවරක් (Bridge aircraft) ලෙස භාවිත කිරීමට නියමිතය. ජනාධිපතිවරයා ගමන් ගන්නා ඕනෑම ගුවන් හමුදා යානයක් සඳහා ‘එයාර් ෆෝස් වන්’ යන නිල සංඥා නාමය භාවිත වන බැවින්, මෙහෙයුම් අවශ්යතා අනුව ඉදිරියේදී යානා කිහිපයක්ම එම නමින් භාවිත කළ හැකි බව අමෙරිකානු ආරක්ෂක අංශ පෙන්වා දෙයි.
