බලහත්කාරි ශ්රමය (Forced Labor) යොදාගනිමින් සිදුකරන නිෂ්පාදන ආනයනය කිරීමේදී අමෙරිකා එක්සත් ජනපදය විසින් පැනවීමට යෝජනා කර ඇති තීරු බද්ද සම්බන්ධයෙන් සමාජය තුළ පවතින වැරදි තොරතුරු සහ මිත්යා මත කම්කරු ඇමැති සහ මුදල් හා ක්රමසම්පාදන නියෝජ්ය ඇමැති ආචාර්ය අනිල් ජයන්ත ප්රනාන්දු මහතා ප්රතික්ෂේප කරයි.
අමාත්යවරයා පෙන්වා දෙන්නේ මෙය ශ්රී ලංකාවට පමණක් පැනවූ බද්දක් නොව, ලෝකයේ රටවල් 60කට පමණ බලපාන පොදු ක්රියාවලියක යෝජනාවක් පමණක් බවයි. අමෙරිකාව සිය වෙළෙඳ පරතරය පියවා ගැනීම සහ සැපයුම් ජාලයන්හි කාර්යක්ෂමතාව ඉහළ නැංවීම සඳහා මෙම තීරු බදු සංශෝධන යෝජනා කර ඇති අතර, නිෂ්පාදන ක්රියාවලියේදී බලහත්කාරි ශ්රමය යොදාගන්නේද යන්න පිළිබඳව මේ වන විට පුළුල් පරීක්ෂණයක් ආරම්භ කර තිබේ.
මෙම පරීක්ෂණ ලැයිස්තුවට ශ්රී ලංකාවට අමතරව ඉන්දියාව, බංග්ලාදේශය, පකිස්තානය, මැලේසියාව වැනි කලාපීය රටවල් මෙන්ම චීනය, ජපානය, යුරෝපා සංගමය, එක්සත් රාජධානිය සහ කැනඩාව වැනි සංවර්ධිත රටවල් ද ඇතුළත් වේ.
මේ වන විටත් ශ්රී ලංකාව රාජ්යතාන්ත්රික මට්ටමින් අමෙරිකාව සමඟ සාකච්ඡා පවත්වමින් සිටින බව පැවසූ අමාත්යවරයා, වෙළෙඳ අමාත්යාංශ ලේකම්වරයාගේ ප්රධානත්වයෙන් විශේෂ කමිටුවක් පත් කර ඇති බව ද සඳහන් කළේය. ලංකාවේ නිෂ්පාදන ක්රියාවලිය තුළ බලහත්කාරි ශ්රමය යොදා නොගන්නා බව තහවුරු කිරීමටත්, අමෙරිකානු පරීක්ෂණ කණ්ඩායම් වෙත අවශ්ය තොරතුරු ලබාදීමටත් රජය සූදානම් බව ද ඇමැතිවරයා වැඩිදුරටත් සහතික විය.
