චීනය මත පවතින යැපීම අවම කරමින් ආරක්ෂිත සැපයුම් දාමයක් ගොඩනගා ගැනීම සඳහා, මිත්ර රටවල් තීරණාත්මක ඛනිජ ද්රව්ය (Critical minerals) වෙනුවෙන් වැඩි මිලක් ගෙවීමට සූදානම් විය යුතු බව ඇමෙරිකානු වෙළඳ නියෝජිත ජේමියසන් ග්රීර් (Jamieson Greer) ප්රකාශ කර තිබේ. ෆිනෑන්ෂල් ටයිම්ස් (FT) පුවත්පත සමඟ පැවැති සම්මුඛ සාකච්ඡාවකදී ඔහු පවසා ඇත්තේ මෙම අමතර පිරිවැය ‘ජාතික ආරක්ෂක වාරිකයක්’ (National security premium) ලෙස සැලකිය යුතු බවයි.
විශේෂයෙන්ම යුරෝපය ඇතුළු විශ්වාසනීය වෙළඳ හවුල්කරුවන්ගෙන් මෙම ඛනිජ ද්රව්ය ලබාගැනීම මගින් සැපයුම් දාමයේ සුරක්ෂිතතාව තහවුරු කළ හැකි බව ඔහු පෙන්වා දෙයි. චීනය දැනට ගෝලීය ඛනිජ වෙළඳපොළේ පවත්වාගෙන යන ඒකාධිකාරය බිඳ දැමීම සඳහා මෙම පියවර අත්යවශ්ය බව ග්රීර් අවධාරණය කළේය. “ආරක්ෂිත සැපයුම් දාමයක් පවත්වාගෙන යාම සඳහා අප සැමට යම් වාරිකයක් ගෙවීමට සිදුවන අතර, එය ජාතික ආරක්ෂාව වෙනුවෙන් කරන ආයෝජනයක්” බව ඔහු වැඩිදුරටත් සඳහන් කර ඇත. මෙම ප්රකාශයත් සමඟ ගෝලීය වෙළඳ ක්ෂේත්රය තුළ ඛනිජ ද්රව්ය මිල ඉහළ යාම සහ නව වෙළඳ සන්ධාන ඇතිවීම පිළිබඳව දැඩි අවධානයක් යොමුව තිබේ.
