අවුරා ලංකා සමාගමේ සභාපති විරංජිත් තාඹුගල මහතා හෙලිකොප්ටර් යානයක් මිලදී ගැනීමේ ගනුදෙනුවකදී රුපියල් මිලියන 70ක මූල්ය වංචාවක් සිදුකළ බවට චෝදනා කරමින් අපරාධ පරීක්ෂණ දෙපාර්තමේන්තුව (CID) මඟින් පවරා තිබූ නඩුවෙන් ඔහුව සම්පූර්ණයෙන්ම නිදහස් කිරීමට කොළඹ අතිරේක මහේස්ත්රාත් දර්ශිමා ප්රේමරත්න මහත්මිය අද (22) තීන්දු කළාය.
නීතිපතිවරයාගේ උපදෙස් පරිදි මෙම සැකකරුට එරෙහිව අපරාධමය නඩුවක් පවත්වාගෙන යාමට කිසිදු නීතිමය පදනමක් නොමැති බැවින් ඔහුව මෙලෙස නිදහස් කරන බව මහේස්ත්රාත්වරිය ප්රකාශ කළාය. මීට අමතරව, ඔහුට පනවා තිබූ විදේශ ගමන් තහනම ද වහාම ක්රියාත්මක වන පරිදි ඉවත් කිරීමට අධිකරණය පියවර ගත්තේය.
තාඹුගල මහතා වෙනුවෙන් පෙනී සිටි ජ්යෙෂ්ඨ නීතිඥ උපාලි ජයමාන්න මහතා අධිකරණය හමුවේ කරුණු දක්වමින් කියා සිටියේ, මෙම චෝදනාව පදනම් විරහිත මෙන්ම පෞද්ගලික තරහ පිරිමසා ගැනීමක් වශයෙන් ගොනු කරන ලද්දක් බවයි. එකල සිටි ප්රබල දේශපාලනඥයන් පිරිසක් තම සේවාදායකයා සමඟ පැවැති පෞද්ගලික අමනාපකම් මත මෙම නීතිමය ක්රියාමාර්ගය මෙහෙයවා ඇති බව ද ඔහු පෙන්වා දුන්නේය.මෙම සිදුවීම් මාලාවට අදාළව, විරංජිත් තාඹුගල මහතා විසින් මීට පෙර මහේස්ත්රාත්වරිය හමුවේ රහසිගත ප්රකාශයක් ද ලබා දී තිබුණි.
