රුපියල් කෝටි පහමාරකට අධික වටිනාකමකින් යුත්, කිලෝ 04 කට ආසන්න අයිස් මත්ද්රව්ය තොගයක් අඩංගු ගමන් මල්ලක් බදුරලිය, තුඩගල ප්රදේශයේ කැලෑවක තිබී සොයා ගත් බව බදුරලිය පොලිසිය පවසයි. මෙය කළුතර කොට්ඨාසය තුළින් මෙතෙක් සොයාගත් විශාලම අයිස් මත්ද්රව්ය තොගය බව ද පොලිසිය සඳහන් කරයි.
බදුරලිය, තුඩගල පාලම අසල ප්රදේශයේ පිහිටි කැලෑවක් තුළ තිබූ මෙම ගමන් මල්ල පරීක්ෂා කිරීමේදී, එහි තිබූ විශාල ප්රමාණයේ පාර්සල් 60ක් තුළ අයිස් මත්ද්රව්ය කිලෝ 03 යි ග්රෑම් 362 ක ප්රමාණයක් තිබී සොයාගෙන ඇත. මතුගම ප්රදේශයේ සිට පුද්ගලයෙකු බදුරළිය ප්රදේශයට අයිස් මත්ද්රව්ය රැගෙන එන බවට ලද රහසිගත තොරතුරකට අනුව පොලිස් නිලධාරීන් එම ස්ථානයට ළඟා වී තිබුණ ද, ඒ වන විටත් සැකකරුට පොලිසිය පිළිබඳ සැක සිතී මත්ද්රව්ය අඩංගු ගමන් මල්ල දමා පලාගොස් තිබේ. ඒ අනුව එය රැගෙන යාමට නියමිතව සිටි අනෙක් පුද්ගලයා ද එම ස්ථානයට නොපැමිණ ඇති බවට පොලිසිය සැක කරයි.
ගමන් මල්ලේ හිමිකරුවා ඇතුළු සිද්ධියට සම්බන්ධ සෙසු පුද්ගලයන් අත්අඩංගුවට ගැනීම සඳහා පොලිසිය ඉදිරි විමර්ශන පුළුල් කර ඇත. කළුතර නියෝජ්ය පොලිස්පතිනි පද්මිණී වීරසූරිය, ජ්යෙෂ්ඨ පොලිස් අධිකාරී උදය කුමාර සහ සහකාර කාන්තා පොලිස් අධිකාරී ඉනෝකා ලියනගේ යන නිලධාරීන්ගේ උපදෙස් මත, බදුරලිය පොලිස් ස්ථානාධිපති පී.බී. වැදිසිංහගේ මෙහෙයවීමෙන් අපරාධ අංශයේ ස්ථානාධිපති නිලංග, පොලිස් සැරයන් සුමිත් සහ පොලිස් කොස්තාපල් අබේවික්රම යන නිලධාරීන් විසින් මෙම වැටලීම සිදු කර තිබේ.
