වැල්ලවත්ත කවිරත්න පෙදෙසේ පිහිටි නීතිඥවරියකගේ දෙමහල් නිවසට ඇතුළු වූ පුද්ගලයන් පිරිසක් විසින් රුපියල් කෝටි දෙකකට ආසන්න වටිනා රන් ආභරණ තොගයක් බහා තිබූ සේප්පුවක් සම්පූර්ණයෙන් සොරාගෙන යාමේ අපරාධය වාර්තා වී දින පහක් වැනි කෙටි කාලයක් තුළදී, වැල්ලවත්ත පොලිසිය විසින් ප්‍රධාන සැකකරු ඇතුළු පුද්ගලයන් දෙදෙනෙකු අත්අඩංගුවට ගැනීමට සමත්ව තිබේ. දිවයිනේ ලියාපදිංචි අපරාධකරුවෙකු වන සහ “වැල්ලවත්තේ උබයා” ලෙස හැඳින්වෙන මෙම ප්‍රධාන සැකකරු බන්ධනාගාරගතව සිට මීට සති දෙකකට පමණ ඉහතදී ඇප මත නිදහස් වී පැමිණි අයෙකු වන අතර, අනෙක් සැකකරු ත්‍රීරෝද රථ රියදුරෙකු බව පොලිසිය තහවුරු කර ඇත.
පැහැදිලි සැලසුමකට අනුව නිවසේ වහලය සහ උඩුමහල් ආලින්දය හරහා ඇතුළු වී ඇති සැකකරු, සේප්පුව ඇඳ ඇතිරිල්ලකින් ආවරණය කර කරමත තබාගෙන ගොස් ඇති බව අවට නිවාසවල සීසීටීවී දර්ශන පරීක්ෂා කිරීමේදී අනාවරණය කරගෙන තිබේ. අනතුරුව බොරලැස්ගමුව ප්‍රදේශයේ මිතුරෙකුගේ නිවසකට රැගෙන ගොස් සේප්පුව කඩා රන් ආභරණ ලබාගෙන ඇති අතර, ඒවායින් කොටසක් උකස් කර මත්ද්‍රව්‍ය මිලදී ගැනීම සඳහා යොදාගෙන ඇති අතර තවත් කොටසක් බණ්ඩාරගම අටළුගම ප්‍රදේශයේ පුද්ගලයෙකුට විකුණා ඇත. එමෙන්ම රන් භාණ්ඩ උකස් කරගත් මුදලින් බැංකු ගිණුමකට මුදල් බැර කර ගැනීම සහ ඇඳුම් මිලදී ගැනීම සිදු කර ඇති බව මූලික පොලිස් පරීක්ෂණවලදී හෙළි වී තිබේ.
අත්අඩංගුවට පත් සැකකරුවන් සතුව තිබී මත්ද්‍රව්‍ය මිලිග්‍රෑම් 13,180ක් සහ සොරා ගන්නා ලද රන් ආභරණවලින් පවුම් 30ක පමණ ප්‍රමාණයක් සොයා ගැනීමට පොලිසිය සමත්ව ඇත. මෑත කාලීනව නාගරික ප්‍රදේශ ආශ්‍රිතව ඉලක්කගතව සිදුවන මෙවැනි සංවිධානාත්මක මංකොල්ලකෑම් සහ මත්ද්‍රව්‍ය උවදුර අතර පවතින සෘජු සබඳතාව සමාජීය හා ආරක්ෂක අංශවල දැඩි අවධානයට ලක් වී ඇති අතර, සැකකරුවන් අධිකරණය වෙත ඉදිරිපත් කර ඉදිරි නීතිමය ක්‍රියාමාර්ග ගැනීමට නියමිතය.
