ශ්රී ලංකාවේ සෞඛ්ය පද්ධතියේ ප්රගතිය සමාලෝචනය කිරීම සඳහා පැමිණි ලෝක සෞඛ්ය සංවිධානයේ ජාත්යන්තර විශේෂඥ කණ්ඩායමක් අද (අප්රේල් 20) සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා හමු විය. අමාත්යවරයාගේ ඉල්ලීමකට අනුව මෙරටට පැමිණි මෙම කණ්ඩායම ලබන 24 වැනිදා දක්වා දිවයිනේ රැඳී සිටිමින් සිය අධ්යයන කටයුතු සිදු කිරීමට නියමිතය.
රජය විසින් ක්රියාත්මක කරන “ආරෝග්යා සුවතා මධ්යස්ථාන” (Arogya Health and Wellness Centers) 1,000ක් පිහිටුවීමේ වැඩපිළිවෙල සහ ප්රාථමික සෞඛ්ය සේවා ඩිජිටල්කරණය කිරීමේ ප්රගතිය පිළිබඳව මෙහිදී දීර්ඝව සාකච්ඡා විය. බෝ නොවන රෝග (NCD) පාලනය, පිළිකා කල්තියා හඳුනා ගැනීම සහ ග්රාමීය ජනතාවට ගුණාත්මක සෞඛ්ය සේවාවක් සමීප කිරීම මෙම මධ්යස්ථානවල ප්රධාන අරමුණයි.
සීමිත සම්පත් කළමනාකරණය කරමින් රජය ගෙන ඇති ක්රියාමාර්ග විශේෂඥ කණ්ඩායමේ ඇගයීමට ලක් වූ අතර, සෞඛ්ය සේවාව ඩිජිටල්කරණය සඳහා ලෝක සෞඛ්ය සංවිධානයේ තාක්ෂණික හා මූල්ය සහයෝගය ලබාදීම පිළිබඳව ද අවධානය යොමු විය. මෙම විශේෂඥ සමාලෝචනයෙන් ලැබෙන නිර්දේශ මත පදනම්ව ශ්රී ලංකාවේ සෞඛ්ය ජාලය වඩාත් කාර්යක්ෂම සහ ජනතා කේන්ද්රීය පද්ධතියක් බවට පත් කිරීම රජයේ අපේක්ෂාවයි.
