පවතින දැඩි වියළි කාලගුණික තත්ත්වය සහ අධික උෂ්ණත්වය හමුවේ වනජීවීන්ගේ පැවැත්ම හා පරිසර පද්ධතියේ ආරක්ෂාව තහවුරු කිරීමේ අරමුණින්, රුහුණු (යාල) ජාතික උද්යානයේ I සහ II කලාප එළඹෙන 2026 සැප්තැම්බර් 14 වැනි දින සිට ඔක්තෝබර් 15 වැනි දින දක්වා මාසයක කාලයකට සියලුම සංචාරකයන් සඳහා තාවකාලිකව වසා තැබීමට වනජීවී සංරක්ෂණ දෙපාර්තමේන්තුව තීරණය කර ඇත.
පරිසර අමාත්ය වෛද්ය දම්මික පටබැඳි සහ නියෝජ්ය අමාත්ය ඇන්ටන් ජයකොඩි යන මහත්වරුන්ගේ උපදෙස් මත, සංචාරක අමාත්ය විජිත හේරත් මහතාගේ ප්රධානත්වයෙන් පැවති සාකච්ඡා සහ ක්ෂේත්රයේ පාර්ශ්වකරුවන් සමඟ සිදුකළ සාකච්ඡාවලින් අනතුරුව මෙම තීරණය ගෙන තිබේ. වාර්ෂිකව සැප්තැම්බර් හා ඔක්තෝබර් මාසවල පවතින දැඩි නියඟය හේතුවෙන් සතුන්ට ඇතිවන තාප ආතතිය අවම කිරීම සඳහා අතීතයේ සිටම උද්යානයේ මෙම කලාප වසා තැබීම සිදුකරනු ලබයි.
මෙම වසා තැබෙන කාලසීමාව තුළ නියඟයෙන් පීඩාවට පත් සතුන් සඳහා අඛණ්ඩව ජලය සැපයීම, ස්වාභාවික වැව්, පොකුණු හා දියවැළවල් ප්රතිසංස්කරණය කිරීම මෙන්ම I සහ II කලාප තුළ පිහිටි ප්රවේශ මාර්ග, ගොඩනැඟිලි සහ සංචාරක නිවාසවල නඩත්තු හා අලුත්වැඩියා කටයුතු සිදු කිරීමට නියමිතය. මෙම කාලය තුළ අදාළ කලාපවලට ඇතුළු වීමට අවසර හිමිවන්නේ වනජීවී නිලධාරීන්ට සහ කාර්ය මණ්ඩලයට පමණක් වන අතර, ඔවුන්ගේ සේවය සෙසු කලාප වෙත යොදවනු ඇත.
සංචාරක කර්මාන්තයට සිදුවන බලපෑම අවම කරමින්, දැඩි පීඩනට ලක්ව නොමැති යාල උද්යානයේ III, IV, V සහ VI යන කලාප දෙස් විදෙස් සංචාරකයන් සඳහා බාධාවකින් තොරව විවෘතව පවතියි. එසේම, මෙම කාලසීමාව තුළ උඩවලව, මින්නේරිය, කවුඩුල්ල සහ විල්පත්තුව ඇතුළු දිවයිනේ අනෙකුත් වනෝද්යාන හා ස්වාභාවික සංචාරක ගමනාන්ත වෙත යොමු වන ලෙස පරිසර අමාත්යාංශය සංචාරකයන්ගෙන් සහ සංචාරක නියෝජිතයන්ගෙන් ඉල්ා සිටියි.
