ශ්රී ලංකාවේ කෘෂිකර්මාන්තයේ හැරවුම් ලක්ෂ්යයක් සනිටුහන් කරමින්, ගොවි ජනතාව මුහුණ දෙන ගැටලුවලට සෘජු විසඳුම් ලබා දීම සඳහා “ගොවිජන සභාව” නමින් විශේෂ වැඩසටහන් මාලාවක් ආරම්භ කර තිබේ. කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතාගේ සංකල්පයකට අනුව මෙම වැඩසටහන ක්රියාත්මක වේ.
“ගොවිජන බලය සමඟ පෙරට – ආණ්ඩුවේ ප්රතිපත්ති හා ගොවියාගේ හෙට දවස” යන තේමාව යටතේ පැවැත්වෙන මෙම සභාවල ප්රධාන අරමුණ වන්නේ අමාත්යවරයා සෘජුවම ගොවි ජනතාව අසලට ගොස් ඔවුන්ගේ ප්රාදේශීය සහ වෘත්තීය ගැටලු සාකච්ඡා කර ක්ෂණික විසඳුම් ලබා දීමයි. වත්මන් රජය බලයට පත්ව වසර එකහමාරක් ගතවන අවස්ථාවේදී, ග්රාමීය මට්ටමින් ජනතාව බලගැන්වීමේ අරමුණින් මෙම පියවර ගෙන ඇත.
සමස්ත ලංකා ගොවිජන සම්මේලනය මූලික කරගනිමින් දිවයින පුරා ගොවිජන සභා දහසක් (1000) පැවැත්වීමට සැලසුම් කර ඇති අතර, එහි සමාරම්භක වැඩසටහන් මිනිපේ වම් ඉවුර සහ මොරගහකන්ද ඒකාබද්ධ ගොවි පදනම් කේන්ද්ර කරගනිමින් පැවැත්වුණි. එහිදී අදහස් දැක්වූ අමාත්යවරයා අවධාරණය කළේ, ‘ප්රජා ශක්ති’ වැඩසටහන හරහා ග්රාමීය ජනතාව ආර්ථික, සමාජීය සහ සංස්කෘතික වශයෙන් ඉහළට එසවීම රජයේ ප්රධාන අරමුණ බවයි. තමන්ගේ ප්රදේශයටත් මෙම වැඩසටහන අවශ්ය වන්නේ නම් සමස්ත ලංකා ගොවිජන සම්මේලනය හරහා ඉල්ලීම් කළ හැකි බව කෘෂිකර්ම අමාත්යාංශය වැඩිදුරටත් දැනුම් දෙයි.
