අම්බලන්ගොඩ ඓතිහාසික මෝදර දේවාලයේ 82 වන වාර්ෂික මහා පෙරහැර පැවැත්වීම සඳහා අවසර ලබා නොදීමට අම්බලන්ගොඩ පොලිස් ස්ථානාධිපතිවරයා ගෙන තිබූ තීරණය දැඩි මතභේදයට ලක් කරමින් දේවාලයේ පෙරහැර කමිටුව විසින් අභියාචනාධිකරණය හමුවේ රිට් පෙත්සමක් ගොනු කර තිබිණි. ආදිත්‍ය පටබැඳිගේ සහ බී. ශෂි මහෙන්ද්‍රන් යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ල හමුවේ මෙම නඩුව සලකා බැලුණු අතර, එහිදී දෙපාර්ශ්වය අතර ඇති කරගත් එකඟතාවක් මත පෙරහැර පැවැත්වීමට අදාළ අනුමැතිය හිමි විය.
පෙරහැර කමිටුව වෙනුවෙන් පෙනී සිටි නීතිඥවරයා සහ රජය වෙනුවෙන් පෙනී සිටි නියෝජ්‍ය සොලිසිටර් ජනරජවරයා විසින් අධිකරණය හමුවේ කරුණු දැක්වීමෙන් අනතුරුව මෙම නීතිමය තත්ත්වය විසඳා ගැනීමට හැකි විය. සාම්ප්‍රදායික හා ආගමික වතාවත් අඛණ්ඩව පවත්වාගෙන යාමේ අයිතිය සහ නීතිය හා සාමය අතර පවතින සීමාවන් නිසි ලෙස තුලනය කරමින් ගත් මෙම තීරණය හේතුවෙන් ප්‍රදේශයේ සංස්කෘතික හා ආගමික උරුමය ආරක්ෂා කර ගැනීමට මඟපෑදී ඇත.
අධිකරණ නියෝගයත් සමඟ මෝදර දේවාලයේ වාර්ෂික මහා පෙරහැර සාර්ථකව පැවැත්වීම සඳහා අවශ්‍ය කටයුතු සංවිධානය කිරීමට මේ වන විට කමිටුවට අවස්ථාව ලැබී තිබේ. ඉදිරි දිනවලදී කිසිදු බාධාවකින් තොරව නියමිත පරිදි ආගමික චාරිත්‍ර ඉටු කිරීමටත්, බැතිමතුන්ට සහභාගී වීමටත් අවශ්‍ය වාතාවරණය මෙම නීතිමය විසඳුම හරහා තහවුරු වී ඇත.
