හිටපු ජනාධිපති මහින්ද රාජපක්ෂ මහතාගේ ජීවිත කතාව ඇසුරින් චිත්‍රපටයක් නිර්මාණය කිරීමේ සැලසුමක් පවතින බව වාර්තා වේ. මෙම ව්‍යාපෘතිය සඳහා ‘ගින්නෙන් උපන් සීතල’ චිත්‍රපටයේ නිෂ්පාදක ජයලත් පීරිස් මහතා සම්බන්ධ වී සිටින බව මාධ්‍ය වාර්තා සඳහන් කරයි. මහින්ද රාජපක්ෂ මහතාගේ ජීවිත කතාව ඇසුරින් biopic එකක් නිර්මාණය කිරීමට සැලසුම් කර ඇති බවට මීට පෙරද නාමල් රාජපක්ෂ මහතා ප්‍රකාශ කර තිබුණි.
නවතම වාර්තාවකට අනුව, චිත්‍රපට ව්‍යාපෘතිය සම්බන්ධයෙන් ජයලත් පීරිස් මහතා නාමල් රාජපක්ෂ මහතා හමුවී ඇති අතර, මහින්ද රාජපක්ෂ මහතාගේ චරිතය සඳහා නාමල් රාජපක්ෂ මහතාට රංගනයට එක්වන ලෙස යෝජනා කර ඇති බව සඳහන් වේ. කෙසේ වෙතත්, මෙම හමුව සහ එහිදී සිදුවූ බව කියන සංවාද සම්බන්ධයෙන් ස්වාධීන නිල තහවුරු කිරීමක් මෙතෙක් හමු වී නොමැත.
එම වාර්තාවට අනුව, නාමල් රාජපක්ෂ මහතා එම ආරාධනය ප්‍රතික්ෂේප කර ඇති අතර, මහින්ද රාජපක්ෂ මහතාගේ චරිතයට ගැළපෙන නළුවෙකු සොයා ගැනීම සඳහා සහාය ලබාදෙන බවද සඳහන් කර තිබේ. කේරල සිනමාවේ නළුවෙකු එම චරිතයට සම්බන්ධ කරගැනීමේ අදහසද එම වාර්තාවේ සඳහන් වන නමුත්, නළුවාගේ නමක් හෝ නිල වශයෙන් තහවුරු කළ තොරතුරක් මෙතෙක් ප්‍රකාශයට පත්වී නොමැත.
