සමාජ මාධ්‍ය පරිශීලකයන්ගේ පෞද්ගලික දත්ත රහස්‍යතාව සහ ප්‍රතිපත්ති සම්බන්ධයෙන් ඔවුන්ව හිතාමතාම නොමඟ යවා මුළා කර ඇති බවට ‘මෙටා’ (Meta) සමාගම වරදකරු බව අමෙරිකාවේ නිව් මෙක්සිකෝ ප්‍රාන්ත ජූරි සභාවක් විසින් ඓතිහාසික තීන්දුවක් ලබා දී තිබේ. කුප්‍රකට කේම්බ්‍රිජ් ඇනලිටිකා දත්ත වංචාව මුල් කරගනිමින් මීට වසර කිහිපයකට පෙර ගොනු කරන ලද නඩුවකදී මෙම තීන්දු ප්‍රකාශයට පත් කර ඇති අතර, ගෝලීය තාක්ෂණික දැවැන්තයන්ගේ පෞද්ගලිකත්ව ප්‍රතිපත්ති සහ වගවීම පිළිබඳ ජාත්‍යන්තර මට්ටමින් දැඩි කතාබහක් මේ හරහා යළිත් මතුව තිබේ.
සති දෙකක කාලයක් පුරා පැවති නඩු විභාගයකින් අනතුරුව අනාවරණය වී ඇත්තේ නිව් මෙක්සිකෝ ප්‍රාන්තයේ මිලියන දෙකකට අධික ජනගහනයට බලපාන පරිදි මෙටා සමාගම විසින් නීති උල්ලංඝනය කිරීම් කෝටි 4.3 කට වඩා සිදු කර ඇති බවයි. එක් නීති උල්ලංඝනයක් සඳහා උපරිම ඩොලර් 5,000 බැගින් දඩ නියම කළහොත්, න්‍යායාත්මකව මෙම සමස්ත දඩ මුදම අමෙරිකානු ඩොලර් බිලියන 219 ක දැවැන්ත අගයක් දක්වා ඉහළ යා හැකි අතර, මහා තාක්ෂණික සමාගම් නීතියේ රැහුවට යටත් කරලීමේ අරමුණින් නීතිපතිවරයා ගෙන ගිය මෙම නීතිමය සටන මෙටා සමාගම මුහුණ දුන් ප්‍රබලම පරාජයක් ලෙස විචාරකයෝ පෙන්වා දෙති.
මෙම තීන්දුවත් සමඟ ඉදිරියේදී විනිසුරුවරයා විසින් නියම කරනු ලබන දඬුවම් සහ දඩ මුදල් මත මෙටා සමාගමේ ඉදිරි මූල්‍ය ස්ථාවරත්වය දැඩි ලෙස තීරණය වනු ඇත. චෝදනා තරයේ ප්‍රතික්ෂේප කරමින් මෙටා සමාගම අභියාචනාධිකාරී ක්‍රියාමාර්ග වෙත යොමු වීමට සැරසී සිටියද, ලොව පුරා අනෙකුත් තාක්ෂණික සමාගම් වෙතද මෙම නඩු තීන්දුව හරහා දත්ත රහස්‍යතාව පිළිබඳ දැඩි පණිවිඩයක් ලබා දී තිබේ.
