හිටපු නියෝජ්‍ය අමාත්‍ය ශාන්ත ප්‍රේමරත්නට එරෙහි අල්ලස් නඩුවේ වරදකරු කිරීම සහ සිර දඬුවම අභියෝගයට ලක් කරමින් ඉදිරිපත් කළ අභියාචනය විභාගයට ගැනීමට ශ්‍රේෂ්ඨාධිකරණය අද (15) අවසර ලබා දී තිබේ.
ලංකා විදුලිබල මණ්ඩලයේ රැකියාවක් ලබා දෙන බවට පොරොන්දු වී කාන්තාවකගෙන් රුපියල් 50,000ක මුදලක් අල්ලස් ලෙස ඉල්ලා ලබාගත් බවට ඔහුට එරෙහිව චෝදනා එල්ල වී තිබිණි. අල්ලස් හෝ දූෂණ චෝදනා විමර්ශන කොමිෂන් සභාව විසින් මෙම නඩුව පවරා තිබේ.
දීර්ඝ නඩු විභාගයකින් අනතුරුව 2017 වසරේදී මහාධිකරණය ඔහු එම චෝදනාවට වරදකරු කර වසර හතරක බරපතළ වැඩ සහිත සිර දඬුවමක් නියම කළේය. අනතුරුව 2024 නොවැම්බර් 5 වැනිදා අභියාචනාධිකරණය ද එම වරදකරු කිරීම තහවුරු කර තිබිණි.
එම තීන්දුවට එරෙහිව ඉදිරිපත් කළ අභියාචනය සලකා බැලූ අචල වෙංගප්පුලි, අර්ජුන ඔබේසේකර සහ ගිහාන් කුලතුංග යන විනිසුරුවරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල, නඩුවේ චෝදනාව සාධාරණ ලෙස ඔප්පු කර තිබේද යන කරුණ සම්බන්ධයෙන් අභියාචනය විභාග කිරීමට අවසර ලබා දී ඇත.
අභියාචනයේ ඉදිරි විභාගය සඳහා 2027 මාර්තු 29 වැනිදා දින නියම කර තිබේ.
කෙසේ වෙතත්, ශ්‍රේෂ්ඨාධිකරණය අභියාචනය විභාගයට ගැනීමට අවසර ලබාදීමෙන් පමණක් පෙර අධිකරණ තීන්දුව හෝ සිර දඬුවම අවලංගු වී නොමැත.
